மற்றவர்கள் சத்தம் போட்டால் போடட்டும்: யாரை சொல்கிறார் ரஜினி
- IndiaGlitz, [Friday,February 23 2018]
சூப்பர் ஸ்டார் ரஜினிகாந்த் அவர்கள் வெகுவிரைவில் தனது அரசியல் கட்சியை அதிகாரபூர்வமாக அறிவிக்கவுள்ள நிலையில் சற்றுமுன் சென்னை ராகவேந்திரா திருமண மண்டபத்தில் நெல்லை மாவட்ட ரசிகர் மன்ற நிர்வாகிகளை சந்தித்து பேசி வருகிறார். முந்தைய ரசிகர் மன்ற கூட்டங்களில் காணொளி காட்சியில் மட்டும் பேசிவந்த ரஜினிகாந்த் முதல் முறையாக நெல்லை மாவட்ட நிர்வாகிகளிடம் நேரில் கலந்துரையாடுகிறார் என்பது குறிப்பிடத்தக்கது. இந்த கூட்டத்தில் ரஜினிகாந்த் பேசியதாவது:
இன்று நெல்லை மாவட்ட ரசிகர்களை சந்திக்கின்றேன்.. அனைத்து ரசிகர்களையும் சந்திக்க சில நாட்கள் ஆகும். மற்றவர்கள் சத்தம் போட்டால் போடட்டும்; நாம் வேலையை அமைதியாக வேலை செய்வோம். எனது ரசிகர்களுக்கு யாரும் அரசியல் பாடம் கற்றுத்தர தேவையில்லை; அவர்கள்தான் மற்றவர்களுக்கு கற்றுத்தருவார்கள்.
அரசியலில் அடிப்படை கட்டமைப்பு தான் முக்கியம். பெரிய கட்சிகள் தோல்விகளை சந்தித்தாலும் அதன் கட்டமைப்புதான் அந்த கட்சிகளை பாதுகாத்து வருகிறது. குடும்பத்துக்குள் ஒற்றுமை எவ்வளவு முக்கியமோ அதே மாதிரி கட்சிக்குள்ளும் இருக்கவேண்டும். ரஜினி மக்கள் இயக்கம் 32 ஆண்டுகளாக கவனத்துடன் திட்டமிட்டு கட்டமைக்கப்பட்டது; இதனை மேலும் பலப்படுத்துவதே நமது நோக்கம்
இவ்வாறு ரஜினிகாந்த் பேசி வருகிறார்.