அரசியல் ஆழம் தெரிந்ததால்தான் அமைதியாக உள்ளேன்: ரஜினிகாந்த்
- IndiaGlitz, [Tuesday,December 26 2017]
சூப்பர் ஸ்டார் ரஜினிகாந்த் இன்று ரசிகர்களை இரண்டாம் கட்டமாக சென்னை ராகவேந்திரா திருமண மண்டபத்தில் சந்தித்து வருகிறார். இந்த நிகழ்ச்சியில் ரஜினியுடன் இயக்குனர் மகேந்திரன் மற்றும் தயாரிப்பாளர் கலைஞானம் ஆகியோர் மேடையில் உள்ளனர்.
ரசிகர்களுடன் புகைப்படம் எடுப்பதற்கு முன்னதாக ரஜினி இந்த நிகழ்ச்சியில் பேசியதாவது: நான் அரசியலுக்கு வருவேனா இல்லையா என்று மக்களை விட ஊடகங்கள் மிகவும் ஆர்வமாக இருக்கின்றன. போர் வரும்போது பார்த்துக் கொள்ளலாம் என்று சொன்னேன், போர் என்றால் தேர்தல் தான். இப்போது என்ன போர் வந்துவிட்டதா?
நான் சீன் போடுவதாகவும், அரசியல் குறித்த அறிவிப்பை இழுத்து கொண்டே செல்வதாகவும் சிலர் கூறுகின்றனர். நான் அரசியலுக்கு 1996ம் ஆண்டே வந்துவிட்டேன், அரசியல் ஆழம் தெரிந்துதான் அமைதியாக உள்ளேன். இந்த ஆழத்தை தெரியாமல் இருந்திருந்தால் எப்போதோ வந்திருப்பேன்.
யுத்தத்திற்கு போனால் ஜெயிக்கணும். ஜெயிக்ணும்னா வீரம் மட்டும் போதாது, வியூகம் வேண்டும், புத்தியை பயன்படுத்த வேண்டும். நான் அரசியலுக்கு வருவேன் என்று சொல்லவில்லை.. வரும் 31ம் தேதி எனது அரசியல் நிலைப்பாட்டை பற்றி தெரியப்படுத்துவேன்.
என்னுடைய பிறந்த நாள் அன்று இந்த முறை அதிக ரசிகர்கள் என்னுடைய வீட்டின் முன் வந்திருந்தனர், அவர்களை நான் பார்க்க முடியவில்லை மன்னித்து விடுங்கள்.