சமீபத்தில் திருவண்ணாமலையில் மண் சரிவு ஏற்பட்டு ஒரே வீட்டில் இருந்த ஏழு பேர் பரிதாபமாக உயிரிழந்த சம்பவம் தமிழ்நாட்டையே உலுக்கிய நிலையில், இந்த சம்பவத்திற்கு ரஜினிகாந்த் தனது அதிர்ச்சியை தெரிவித்துள்ளார்.

சூப்பர் ஸ்டார் ரஜினிகாந்த் நடித்து வரும் ’கூலி’ படத்தின் படப்பிடிப்பு கடந்த சில மாதங்களாக நடைபெற்று வரும் நிலையில், இந்த படத்தின் அடுத்த கட்ட படப்பிடிப்பு ஜெய்பூரில் நடைபெற உள்ளது.

இந்த படப்பிடிப்பில் கலந்து கொள்வதற்காக ரஜினிகாந்த் ஜெய்ப்பூர் செல்வதற்காக இன்று சென்னை விமான நிலையம் வந்தார். அப்போது செய்தியாளர்கள் அவரை சந்தித்து ’கூலி’ படம் குறித்த பல்வேறு கேள்விகள் கேட்டபோது, அதற்கு அவர் பதில் கூறினார்.

அதன் பின்னர் சமீபத்திய புயலின் போது திருவண்ணாமலையில் ஏற்பட்ட மண்சரிவால் 7 பேர் உயிரிழந்த சம்பவம் குறித்த கேள்விக்கு பதில் அளித்த ரஜினிகாந்த், "எப்போ?" என்று கேட்டார். அதன் பின்னர், "ஓ மை காட்," என்று பதில் அளித்தார். இது குறித்த வீடியோ இணையத்தில் வைரல் ஆகி வருகிறது.

திருவண்ணாமலை மண் சரிவு ஏற்பட்டு ஏழு பேர் உயிரிழந்த சம்பவம் தமிழகத்தையே பெரும் அதிர்ச்சிக்கு உள்ளாக்கிய நிலையில் உயிரிழந்த குடும்பத்தினருக்கு தமிழக முதல்வர் நிவாரண நிதி வழங்கினார் என்பது குறிப்பிடத்தக்கது.