கபாலி டைட்டில் பிரச்சனையை சுமூகமாக தீர்ப்போம். தாணு
- IndiaGlitz, [Wednesday,August 19 2015]
சூப்பர் ஸ்டார் ரஜினிகாந்த் நடிக்கும் படத்தின் டைட்டில் 'கபாலி' என இயக்குனர் ரஞ்சித் அறிவித்த சில மணி நேரங்களில் இதே பெயரில் ஒரு படம் ஏற்கனவே தயாராகி வருவதாகவும், சிவகுமார் என்பவர் தயாரித்து நடித்து வரும் இந்த படத்தின் படப்பிடிப்பு 90% வரை முடிந்துவிட்டதாகவும் இணையதளங்களில் செய்திகள் வெளிவந்தது.
இந்நிலையில் 'கபாலி' படத்தின் தயாரிப்பாளர் கலைப்புலி எஸ்.தாணு இதுகுறித்து செய்தியாளர்களிடம் கருத்து கூறியபோது, "நாங்கள் 'கபாலி' டைட்டிலை அறிவிப்பதற்கு முன்னர் தயாரிப்பாளர் கவுன்சில், தயாரிப்பாளர் கில்டு மற்றும் பிலிம் சேம்பர் ஆகியவற்றில் இந்த டைட்டிலை வேறு யாரேனும் பதிவு செய்துள்ளார்களா? என்பதை சோதனை செய்து அதன்பின்னர் முறைப்படி இந்த டைட்டிலை பதிவு செய்தோம். இருப்பினும் இதே பெயரில் ஒரு படம் ஏற்கனவே தயாராகி கொண்டிருப்பது குறித்து அறிந்தவுடன் அந்த படத்தின் தயாரிப்பாளருடன் பேச்சுவார்த்தை நடத்தி விரைவில் இந்த பிரச்சனைக்கு சுமூக முடிவை காண்போம்' என்று கூறியுள்ளார்.
ரஜினிகாந்த், ராதிகா ஆப்தே, தன்ஷிகா, கலையரசன், தினேஷ், மற்றும் பலர் நடிக்கும் இந்த படத்திற்கு சந்தோஷ் நாராயணன் இசையமைக்கின்றார். இந்த படத்தின் படப்பிடிப்பு அடுத்தமாதம் செப்டம்பரில் தொடங்கவுள்ளது.