రజినీకాంత్ పార్టీ పేరు, గుర్తు ఖ‌రారు
- IndiaGlitz, [Tuesday,December 15 2020]
త‌లైవా.. సూప‌ర్‌స్టార్ రజినీకాంత్ డిసెంబ‌ర్ 31న త‌న రాజ‌కీయ పార్టీ పేరుని అనౌన్స్ చేసి జ‌న‌వ‌రిలో పార్టీని ప్రారంభిస్తాన‌ని ఇప్ప‌టికే అనౌన్స్ చేసిన సంగ‌తి తెలిసిందే. అస‌లు రజినీకాంత్ త‌న పార్టీకి ఏ పేరు పెడ‌తారోన‌ని, ఎలాంటి గుర్తును ఎన్నిక‌ల చిహ్నంగా తీసుకుంటారోన‌ని ఆస‌క్తిక‌ర‌మైన క‌థ‌నాలు సోష‌ల్ మీడియాలో చ‌క్క‌ర్లు కొడుతున్నాయి.
వివ‌రాల మేర‌కు రజినీకాంత్ త‌న పార్టీ పేరును ‘మ‌క్క‌ల్ సేవై క‌ట్చి’ (అంటే ప్ర‌జ‌ల‌కు సేవ చేసే పార్టీ అని అర్థం) నిర్ణ‌యించారట. అలాగే పార్టీ గుర్తుగా ఆటోరిక్షాను ఎన్నిక‌ల సంఘం ఖ‌రారు చేసింద‌ని అంటున్నారు. ఈ స‌స్పెన్స్‌కు తెర వీడాలంటే డిసెంబ‌ర్ 31 వ‌ర‌కు ఆగాల్సిందే.
ఈలోపు రజినీకాంత్ త‌న పూర్తి చేయాల్సిన సినిమా ‘అణ్ణాతే’ను పూర్తి చేసే పనిలో ఉన్నాడు. శివ ద‌ర్శ‌క‌త్వంలో స‌న్‌పిక్చ‌ర్స్ బ్యాన‌ర్‌పై ఈ సినిమా రూపొందుతోంది. కోవిడ్ ప్ర‌భావం కారణంగా ఆరేడు నెల‌లుగా ఆగిపోయిన సినిమా కోసం హైదరాబాద్ రామోజీ ఫిలింసిటీలో వేసిన భారీ సెట్ వేశారు. ర‌జినీకాంత్‌తో పాటు న‌య‌న‌తార కూడా హైదరాబాద్ చేరుకున్నారు. లాంగ్ షెడ్యూల్‌ను ఎలాంటి బ్రేక్స్ లేకుండా పూర్తి చేయాల‌నేది ఆలోచ‌న‌గా క‌నిపిస్తోంది.