எழுத்தாளர் பாலகுமாரன் மறைவிற்கு ரஜினிகாந்த் இரங்கல்
- IndiaGlitz, [Tuesday,May 15 2018]
பிரபல எழுத்தாளர் பாலகுமாரன் இன்று சென்னையில் காலமானார் அவரது மறைவு தமிழ் எழுத்துலகிலும், திரையுலகிலும் பெரும் அதிர்ச்சியை ஏற்படுத்தியுள்ளது. குறிப்பாக பாலகுமாரனின் நெருங்கிய நண்பர்களில் ஒருவராகிய ரஜினிக்கு அவருடைய மறைவு மிகப்பெரிய இழப்பாக கருதப்படுகிறது
இந்த நிலையில் இன்று பாலகுமாரன் மறைவை அடுத்து அவருக்கு ரஜினிகாந்த் நேரில் இறுதியஞ்சலி செலுத்தினார். பின்னர் அவர் செய்தியாளர்களிடம் கூறியபோது, 'மறைந்த எழுத்தாளர் பாலகுமாரன் அவர்கள் இலக்கியம், ஆன்மீகம் தான் முக்கியம் என்று வாழ்ந்தவர். அவருடைய மரணம் எழுத்துலகிற்கு மிகப்பெரிய இழப்பு. அவருடைய குடும்பத்தார்களுக்கு எனது ஆழ்ந்த அனுதாபத்தை தெரிவித்து கொள்வதோடு அவருடைய ஆத்மா சாந்தியடைய ஆண்டவனை வேண்டுகிறேன்' என்று ரஜினிகாந்த் கூறியுள்ளார்.
ரஜினிகாந்த் நடித்த மிகப்பெரிய வெற்றி படமான 'பாட்ஷா' படத்திற்கு வசனம் எழுதியவர் பாலகுமாரன் என்பது குறிப்பிடத்தக்கது. மேலும் கடந்த இரண்டு ஆண்டுகளுக்கு முன்னர் எழுத்தாளர் பாலகுமாரன் தன்னுடைய குடும்பத்தினர்களுடன் ரஜினிகாந்த் வீட்டிற்கு சென்று மரியாதை நிமித்தமாக சந்தித்தார் என்பது குறிப்பிடத்தக்கது.