అమితాబ్ 3 స‌ల‌హాల్లో 1 దాన్ని పాటించ‌లేక‌పోతున్నాను: రజినీకాంత్
- IndiaGlitz, [Tuesday,December 17 2019]
సూప‌ర్‌స్టార్ రజినీకాంత్ హీరోగా ఎ.ఆర్‌.మురుగ‌దాస్ ద‌ర్శ‌క‌త్వంలో రూపొందుతోన్న చిత్రం 'ద‌ర్బార్‌'. ఈ సినిమా జనవరి 9న సంక్రాంతి సంద‌ర్భంగా విడుద‌ల కానుంది. ఈ నేప‌థ్యంలో ఈ సినిమా ట్రైల‌ర్ విడుద‌ల కార్య‌క్ర‌మం ముంబైలో జరిగింది. ఈ కార్య‌క్ర‌మంలో రజినీకాంత్ విలేక‌రుల‌తో మాట్లాడారు. ఈ మీటింగ్‌లో కొన్ని ఆస‌క్తిక‌ర‌మైన విష‌యాల‌ను తెలియ‌జేశారు. మీకు జీవితంలో స్ఫూర్తినిచ్చిన వ్య‌క్తి ఎవ‌రు? అని విలేక‌రులు అడ‌గ్గా.. నాకు అమితాబ్‌గారు జీవితంలో స్ఫూర్తి. కెమెరా ముందే కాదు... కెమెరా వెనుక కూడా ఆయ‌న నాకు ఇన్‌స్పిరేష‌న్‌గా నిలిచారు.
ఆయ‌న జీవితంలో మూడు స‌ల‌హాల‌ను న‌న్ను న‌టించ‌మ‌ని కోరారు. అందులో మొద‌టిది 60 ఏళ్ల వ‌య‌సులో జాగ్ర‌త్త‌గా ఉండాలి.. త‌రుచూ వ్యాయామం చెయ్‌.. రాజ‌కీయాల్లోకి మాత్రం వెళ్ల‌వ‌ద్దు అని సూచించారు. మొద‌టి రెండు స‌ల‌హాల‌ను పాటించాను కానీ.. కాల ప‌రిస్థితుల కార‌ణంగా మూడో స‌ల‌హాను పాటించ‌లేక‌పోతున్నాను అని అన్నారు. అంటే రాజ‌కీయాల్లోకి ఆయ‌న రావ‌డం ప‌క్కా అయ్యింది. అయితే ఆయ‌న అధికారిక ప్రకటన మాత్రం చేయాల్సి ఉంద‌ని మరోసారి చెప్ప‌క‌నే చెప్పారు తైల‌వా. ఇది వ‌ర‌కు ఆడియో వేడుక‌లో కూడా త‌న రాజ‌కీయాల్లో వ‌స్తున్న‌ట్లు ఇన్ డైరెక్ట్‌గా చెప్పారు రజినీకాంత్.