சூப்பர் ஸ்டார் ரஜினிகாந்த் நடித்த இரண்டு படங்கள் உட்பட சில தமிழ் படங்களையும் ஏராளமான கன்னட படங்களையும் தயாரித்த தயாரிப்பாளர் காலமான நிலையில் அவருக்கு ரஜினிகாந்த் தனது சமூக வலைதள பக்கத்தில் இரங்கல் தெரிவித்துள்ளார்.

கன்னட திரையுலகில் நடிகர், தயாரிப்பாளர், இயக்குனர் துவாரகிஷ் சற்றுமுன் காலமானதாக தகவல் வெளியாகியுள்ளது. கடந்த 1966 ஆம் ஆண்டிலிருந்து தயாரிப்பு தொழிலில் இவர் ஈடுபட்டு வந்தார் என்பதும் ரஜினிகாந்த் நடித்த ’அடுத்த வாரிசு’ மற்றும் ’நான் அடிமை இல்லை’ ஆகிய இரண்டு தமிழ் படங்கள் உட்பட சில தமிழ் படங்களையும் தயாரித்துள்ளார்.

மேலும் ஏராளமான கன்னட படங்களில் நடித்த இவர் ஆரம்ப காலகட்டத்தில் காமெடி நடிகராக அறிமுகம் ஆகி அதன்பின் முக்கிய வேடத்தில் நடித்த பின்னர் தயாரிப்பாளர் மற்றும் இயக்குனராக உயர்ந்தார் என்பது குறிப்பிடத்தக்கது

இந்த நிலையில் பெங்களூரில் உள்ள எலக்ட்ரானிக் சிட்டியில் உள்ள தனது வீட்டில் துவாரகிஷ் காலமானதாக அவருடைய மகன் அறிவித்துள்ளார். அவரது இறுதி சடங்கு இன்று நடக்கும் என்று எதிர்பார்க்கப்படுகிறது. இந்த நிலையில் துவாராகிஷ் மறைவிற்கு நடிகர் ரஜினிகாந்த் தனது சமூக வலைத்தளத்தில் இரங்கல் தெரிவித்துள்ளார். அந்த இரங்கலில் அவர் கூறியிருப்பதாவது:

எனது நீண்ட நாள் அன்பு நண்பர் துவாரகேஷ் மறைவு எனக்கு மிகவும் வேதனை அளிக்கிறது. காமெடி நடிகராக தனது வாழ்க்கையைத் தொடங்கி, ஒரு பெரிய தயாரிப்பாளராகவும், இயக்குனராகவும் தன்னை உயர்த்தியவர். அவருடன் பழகிய இனிய நினைவுகள் என் நினைவுக்கு வருகின்றன. அவரது குடும்பத்தாருக்கு எனது ஆழ்ந்த அனுதாபங்கள் என்று தெரிவித்துள்ளார்.

The demise of my long time dear friend Dwarakesh is very painful to me..starting his career as a comedian, he raised himself up to being a big producer and director.. fond memories come to my mind..my heartfelt condolences to his family and dear ones..

— Rajinikanth (@rajinikanth) April 16, 2024