சூப்பர் ஸ்டார் ரஜினிகாந்த் நடிக்கும் அடுத்த படத்தை இளம் இயக்குனர் கார்த்திக் சுப்புராஜ் இயக்குகிறார் என்றவுடன் கோலிவுட்டில் பலர் ஆச்சரியப்பட்டனர். ரஜினியின் கால்ஷீட்டுக்காக வருடக்கணக்கில் காத்திருக்கும் இயக்குனர்கள் மத்தியில் ஒருசில படங்களே இயக்கிய இளம் இயக்குனர் ஒருவருக்கு ரஜினி மீண்டும் வாய்ப்பு கொடுத்துள்ளது அனைவரையும் ஆச்சரியத்தில் ஆழ்த்தியுள்ளது.

இந்த நிலையில் தனக்கு இந்த வாய்ப்பு கிடைத்தது குறித்து தனது மகிழ்ச்சியை வெளிப்படுத்த வார்த்தைகளே இல்லை என்று ஏற்கனவே கூறிய கார்த்திக் சுப்புராஜ், இந்த படம் குறித்து மேலும் சில தகவல்களை கூறியுள்ளார்.

ரஜினி நடிக்கும் இந்த படம் எந்திரன் டைப் படம் அல்ல. அதேபோல் பிரமாண்டமான படமும் அல்ல. ஆனால் கதையிலும் திரைக்கதையிலும் நிச்சயம் பிரமாண்டம் இருக்கும். மேலும் ஒரு ரஜினி படத்தில் இருக்க வேண்டிய அனைத்து அம்சங்களும் இருக்கும் என்று கூறினார்.

மேலும் இந்த படத்தின் படப்பிடிப்பு இன்னும் இரண்டு மாதங்களில் தொடங்கவுள்ளதாகவும், இந்த வருட இறுதியில் படப்பிடிப்பை முடிக்க திட்டமிட்டுள்ளதாகவும் அவர் தெரிவித்தார்.