கோலிவுட்டின் முன்னணி தயாரிப்பாளர் கலைப்புலி எஸ்.தாணு ஒரே நேரத்தில் சூப்பர் ஸ்டார் ரஜினிகாந்த் நடித்து வரும் 'கபாலி' மற்றும் இளையதளபதி விஜய் நடித்து வரும் 'தெறி' ஆகிய படங்களை தயாரித்து வருகிறார் என்பது அனைவரும் அறிந்ததே. 'தெறி' வரும் ஏப்ரல் மாதத்திலும், 'கபாலி' வரும் மே மாதத்திலும் ரிலீஸ் ஆகும் என எதிர்பார்க்கப்படும் நிலையில் 'கபாலி' படத்தின் வியாபாரம் குறித்த தகவல் தற்போது வெளிவந்துள்ளது

'கபாலி' படத்தின் வட அமெரிக்கா ரிலீஸ் உரிமை ரூ.8.5 கோடிக்கு விற்பனை ஆகியுள்ளதாக தயாரிப்பாளர் எஸ்.தாணு நேற்று நடைபெற்ற 'மலரட்டும் மனித நேயம்' நிகழ்ச்சியில் கூறியிருப்பதாக தகவல்கள் வெளிவந்துள்ளது. இதேபோல் மற்ற நாடுகளின் ரிலீஸ் உரிமையின் வியாபாரம் நடைபெற்று வருவதாகவும் விரைவில் இதுகுறித்த தகவல்கள் வெளிவரும் என்றும் தெரிகிறது.

ரஜினிகாந்த், ராதிகா ஆப்தே, தன்ஷிகா, கலையரசன், தினேஷ், உள்பட பலர் நடித்துள்ள 'கபாலி' படத்திற்கு சந்தோஷ் நாராயணன் இசையமைத்துள்ளார்.