ரஜினி ஒரு சகல 'காலா' வல்லவர்: தமிழிசை செளந்திரராஜன் பாராட்டு
- IndiaGlitz, [Friday,June 08 2018]
சூப்பர் ஸ்டார் ரஜினிகாந்த் நடிப்பில் பா.ரஞ்சித் இயக்கத்தில் தனுஷ் தயாரிப்பில் நேற்று வெளியான 'காலா' திரைப்படம் மிகப்பெரிய வரவேற்பை பெற்றுள்ள நிலையில் இந்த படத்தை நேற்று தமிழக பாஜக தலைவர் தமிழிசை செளந்திரராஜன் சென்னையில் உள்ள ஒரு திரையரங்கில் பார்த்தார் என்பதை ஏற்கனவே பார்த்தோம்.
இந்த நிலையில் இந்த படத்தை பார்த்த பின்னர் கருத்து கூறிய தமிழிசை செளந்திரராஜன், 'காலா' திரைப்படம் சமூக கருத்துக்களை கொண்ட திரைப்படம் என்று கேள்விப்பட்டதால் நாங்கள் இந்த படத்தை பார்த்தோம். காதல், ஆடல், பாடலையும் தாண்டி சமூக கருத்துக்கள் கொண்ட படம் எனக்கு பிடிக்கும். அதனால் தான் 'காலா' படம் பார்க்க வந்தேன். நல்ல நடிப்பு, நல்ல தொழில்நுட்பம், நல்ல முடிவு, என்று படம் உள்ளது. மொத்தத்தில் சகலகலா வல்லவன் என்று சொல்லப்படுபவர் சகல 'காலா' வல்லவன் ஆகியிருக்கிறார்' என்று தமிழிசை கூறியுள்ளார்.
இந்த படத்தில் உள்ள அரசியல் கருத்து குறித்த கேள்விக்குக் பதிலளித்த தமிழிசை, 'ஒரு திரைப்படத்தை அரசியலுடன் இணைத்துப் பார்த்தால் பிரிவைதான் ஏற்படுத்தும், திரைப்படத்தை திரைப்படமாக மட்டும் பார்க்க வேண்டும்' என்று பதில் கூறினார். இதே தமிழிசை அவர்கள்தான் திரைப்படத்தை திரைப்படமாக பார்க்காமல் 'மெர்சல்' படத்தில் கூறப்பட்ட கருத்துகளுக்கு எதிர்ப்பு தெரிவித்தவர் என்று சமூக வலைத்தள பயனாளிகள் கருத்து தெரிவித்து வருகின்றனர்.