தமிழக அரசியல் களத்தில் மிக விரைவில் குதிக்கவுள்ள சூப்பர் ஸ்டார் ரஜினியை கிட்டத்தட்ட விமர்சனம் செய்யாதவர்களே இல்லை என்று கூறும் அளவுக்கு அவர் மீது விமர்சனங்கள் அள்ளி தெளிக்கப்படுகிறது ஆனால் தன் மீதான விமர்சனங்களுக்கு அவர் ஏதாவது ஒரு நிகழ்ச்சியில் அல்லது ஒருசில நிமிடங்கள் பேட்டியில் தெளிவுபடுத்திவிடுவதை வழக்கமாக கொண்டுள்ளார்.

இந்த நிலையில் காவிரி விவகாரம் உள்பட பல விஷயங்களில் ரஜினி கருத்து கூறாமல் ஒதுங்கி போவதாக ரஜினியின் நெருங்கிய நண்பரும் சமீபத்தில் புதிய அரசியல் கட்சியை ஆரம்பித்தவருமான கமல்ஹாசன் கூறியிருந்தார். ரஜினியின் நெருங்கிய நண்பரே அவரை விமர்சனம் செய்தது பெரும் பரபரப்பை ஏற்படுத்தியது.

இந்த நிலையில் கமல்ஹாசனின் குற்றச்சாட்டு குறித்த கேள்வி ஒன்றுக்கு இன்று பதிலளித்த ரஜினிகாந்த், 'நான் முதலிலேயே காவிரி மேலாண்மை குறித்த என்னுடைய கருத்தை கூறிவிட்டேன். காவிரி மேலாண்மை குறித்து சுப்ரீம் கோர்ட் அளித்த தீர்ப்பை நிறைவேற்ற வேண்டும் என்றும் இதற்கு மத்திய அரசு காலம் தாழ்த்தி வருவதாகவும், தமிழக அரசு இன்னும் அழுத்தம் கொடுக்க வேண்டும் என்றும் கூறியுள்ளேன்' என்று கூறிய ரஜினி, கமல் விமர்சனம் குறித்து கருத்து தெரிவிக்க விரும்பவில்லை என்று கூறினார்.