సూప‌ర్‌స్టార్ ర‌జనీకాంత్ మ‌రోసారి రోబో చిట్టిగా త‌న మాయాజాలాన్ని తెర‌పై చూపించ‌డానికి రెడీ అవుతున్నాడు. ర‌జ‌నీకాంత్‌, శంక‌ర్ కాంబినేష‌న్‌లో వ‌చ్చిన సైంటిఫిక్ థ్రిల్ల‌ర్ రోబో సీక్వెల్‌గా రూపొందుతోన్న ఈ చిత్రం చిత్రీక‌ర‌ణ కార్య‌క్ర‌మాల‌ను పూర్తి చేసుకుని పోస్ట్ ప్రొడ‌క్ష‌న్ కార్య‌క్ర‌మాల‌ను జ‌రుపుకుంటుంది. లైకా ప్రొడ‌క్ష‌న్స్ బ్యాన‌ర్‌పై దాదాపు నాలుగు వంద‌ల కోట్ల బ‌డ్జెట్‌తో రూపొందుతోన్న ఈ సినిమాలో బాలీవుడ్ సూప‌ర్‌స్టార్ అక్ష‌య్‌కుమార్ విల‌న్‌గా న‌టిస్తుంటే, ఎమీ జాక్స‌న్ హీరోయిన్‌గా న‌టిస్తుంది.

తెలుగు, త‌మిళం, హిందీ భాష‌ల్లో రూపొందుతోన్న ఈ సినిమాను ఈ ఏడాది దీపావ‌ళి సంద‌ర్భంగా గ్రాండ్ రిలీజ్ చేయ‌బోతున్నారు. సినిమా విడుద‌ల‌కు ముందే సినిమాపై భారీ అంచ‌నాలు నెల‌కొన్నాయి. ఈ సినిమా శాటిలైట్ హ‌క్కుల‌ను జీ టీవీ వారు దాదాపు 110 కోట్ల రూపాయ‌ల‌ను వెచ్చించి కొన్న‌ట్లు వార్త‌లు విన‌ప‌డుతున్నాయి. ఓ ర‌కంగా శాటిలైట్ బిజినెస్ విష‌యంలో 2.0 రికార్డ్ క్రియేట్ చేసిన‌ట్టే..ర‌జ‌నీయా..మ‌జాకానా....