ஐபிஎல் எதிர்ப்பு போராட்டம்: திடீரென களத்தில் குதித்த ரஜினி ரசிகர்கள்
- IndiaGlitz, [Tuesday,April 10 2018]
காவிரி, ஸ்டெர்லைட் போராட்டங்கள் தமிழகத்தில் மிக தீவிரமாக நடைபெற்று கொண்டிருக்கும் நிலையில் இந்த போராட்டங்களை திசைதிருப்பும் வகையில் நடைபெறும் ஐபிஎல் போட்டிகளை உடனடியாக நிறுத்த வேண்டும் என்று ஒருசில அரசியல் கட்சிகள் போராட்டம் நடத்தி வருகின்றன.
இந்த நிலையில் சமீபத்தில் பேட்டியளித்த சூப்பர் ஸ்டார் ரஜினிகாந்த், 'இந்த நேரத்தில் ஐபிஎல் போட்டிகள் சென்னையில் நடத்துவது சரியானதல்ல என்று கூறியிருந்தார். அப்படியே நடத்தினாலும் சென்னை வீரர்கள் கருப்பு பேட்ஜ் அணிந்தும், பார்வையாளர்கள் தங்கள் உணர்வை வெளிப்படுத்தும் வகையில் கருப்பு உடையும் அணியலாம் என்று அவர் ஆலோசனை கூறியிருந்தார். ஆனால் ரஜினியின் இந்த ஆலோசனையை ஐபிஎல் நிர்வாகம் ஏற்க மறுத்துவிட்டது.
இந்த நிலையில் சேப்பாக்கம் மைதானத்தில் சிஎஸ்கே மற்றும் கேகேஆர் அணிகளுக்கு இடையிலான போட்டி இன்னும் சிறிது நேரத்தில் தொடங்கவுள்ள நிலையில் சற்றும்முன் ஐபிஎல் போட்டிக்கு எதிர்ப்பு தெரிவித்து வாலஜா சாலையில் ரஜினி மக்கள் மன்ற நிர்வாகிகள் போராட்டம் செய்தனர். இதனால் அந்த பகுதியில் பெரும் பரபரப்பு ஏற்பட்டுள்ளது.