ద‌ర్శ‌క‌ధీరుడు రాజ‌మౌళి, యంగ్ టైగ‌ర్ ఎన్టీఆర్‌, మెగాప‌వ‌ర్ స్టార్ రామ్‌చ‌ర‌ణ్ కాంబినేష‌న్‌లో రూపొందుతోన్న ప్రెస్టీజియ‌స్ చిత్రం ‘రౌద్రం ర‌ణం రుధిరం’(ఆర్ఆర్ఆర్‌). ఇందులో మ‌న్యం వీరుడు అల్లూరి సీతారామ‌రాజు పాత్ర‌లో మెగాప‌వ‌ర్‌స్టార్ రామ్‌చ‌ర‌ణ్.. గోండు వీరుడు కొమురంభీమ్ పాత్రలో యంగ్ టైగ‌ర్ ఎన్టీఆర్ నటిస్తోన్న సంగ‌తి తెలిసిందే. రెండు నిజమైన చారిత్ర‌క పాత్రల క‌ల్పిత‌గాథే ఈ చిత్రం. రూ.400 కోట్ల‌తో డి.వి.వి.దానయ్య నిర్మిస్తోన్న ఈ చిత్రంలో ఎన్టీఆర్ జోడీగా బ్రిటీష్ భామ ఒలివియా మోరిస్ న‌టిస్తుండ‌గా రామ్‌చ‌ర‌ణ్ జోడీగా బాలీవుడ్ బ్యూటీ ఆలియా భ‌ట్ న‌టిస్తోంది.

ఈ సినిమాను ముందు ఈ ఏడాది జూలై 30న విడుద‌ల చేయాల‌నుకున్నారు. అయితే చిన్న చిన్న కార‌ణాలు, మేకింగ్‌లో కాంప్ర‌మైజ్ కావాల‌నుకోక‌పోవ‌డంతో వ‌చ్చే ఏడాది జ‌న‌వ‌రి 8న విడుద‌ల చేస్తామ‌ని అధికారికంగా ప్ర‌కటించారు. కానీ ఇటీవ‌ల ఓ ఇంట‌ర్వ్యూలో సినిమా విడుద‌ల వచ్చేఏడాది సంక్రాంతికి కూడా ఉండ‌క‌పోవ‌చ్చున‌ని రాజ‌మౌళి తెలియ‌జేసిన సంగ‌తి తెలిసిందే. తాజా స‌మాచారం మేర‌కు ‘ఆర్ఆర్ఆర్‌’ను రాజ‌మౌళి వ‌చ్చే ఏడాది జూలైలో విడుద‌ల చేసేలా ప్లాన్ చేసుకుంటున్నాడ‌ట‌. దాదాపు ఇది ఖాయ‌మ‌ని అంటున్నారు. దీంతో వ‌చ్చే ఏడాది సంక్రాంతి బ‌రిలోని మెగాస్టార్ ఆచార్య వ‌చ్చే అవ‌కాశం ఉంద‌ని అంటున్నారు.