ఉయ్యాల‌జంపాలా, సినిమా చూపిస్త మావ‌, కుమారి 21 ఎఫ్ చిత్రాల‌తో వ‌రుస స‌క్సెస్‌ల‌ను సొంతం చేసుకున్న యువ క‌థానాయ‌కుడు రాజ్‌త‌రుణ్‌కి త‌ర్వాత ఎందుక‌నో ఆశించిన స్థాయిలో స‌క్సెస్‌లు మాత్రం ద‌క్క‌లేదు. ఆయ‌న చేసిన ప్రయ‌త్రాల‌న్నీ విఫ‌ల‌మ‌య్యాయి. ఇప్పుడు రాజ్‌త‌రుణ్ త‌న ఆశ‌ల‌న్నింటినీ `ఇద్ద‌రిదీ ఒక‌టే లోకం` సినిమాపై పెట్టుకున్నాడు. రాజ్‌త‌రుణ్‌, షాలిని పాండే జంట‌గా న‌టించారు. ఈ సినిమాకు నిర్మాత దిల్‌రాజు. నిజానికి ఈ సినిమాను న‌వంబ‌ర్‌లో సినిమాను విడుద‌ల చేయాల‌ని ముందుగా అనుకున్నారు. కానీ మార్కెట్ బాగా లేక‌పోవ‌డంతో దిల్‌రాజు డ్రాప్ అయ్యాడు. ఇక ఆల‌స్యం చేస్తే బావుండ‌ద‌ని భావించిన దిల్‌రాజు `ఇద్ద‌రిదీ ఒక‌టే లోకం` చిత్రాన్ని డిసెంబ‌ర్ 25న విడుద‌ల చేయ‌డానికి స‌న్నాహాలు చేసుకుంటున్నాడ‌ట‌.

ఇప్ప‌టికే కిస్మ‌స్ రేసులో డిసెంబ‌ర్ 20న నంద‌మూరి బాల‌కృష్ణ `రూల‌ర్‌` సినిమాతో పాటు సాయిధ‌ర‌మ్ తేజ్ సినిమా `ప్ర‌తిరోజూ పండ‌గే` సినిమా ఉంది. ఈ రెండు సినిమాల‌కు కాస్త గ్యాప్ ఇచ్చి దిల్‌రాజు `ఇద్ద‌రిదీ ఒక‌టే లోకం` సినిమాను డిసెంబ‌ర్ 25న విడుద‌ల చేయ‌డానికి ప్లాన్ చేస్తున్నాడ‌ట‌. డిసెంబ‌ర్ 25న హాలీడే, జ‌న‌వ‌రి 1 కూడా క‌లిసొచ్చే రోజుగా దిల్‌రాజు భావిస్తున్నాడు. ఏ మాత్రం హిట్ టాక్ వ‌చ్చినా యూత్ ఈ సినిమాను చాలా పెద్ద హిట్ చేస్తార‌న‌డంలో సందేహం లేదు. మ‌రి దిల్‌రాజు ఈ సినిమా విడుద‌ల తేదీని అధికార‌కంగా ఎప్పుడు ప్ర‌క‌టిస్తాడో వేచి చూడాలి.