ஐபிஎல் கிரிக்கெட் தொடர் போட்டிகளில் அதிக ரன்கள் அடித்த பேட்ஸ்மேன், அதிக போட்டிகளில் விளையாடிவர், எந்த போட்டியையும் மிஸ் செய்யாதவர் ஆகிய பெருமைகளை கொண்டவர் சுரேஷ் ரெய்னா. சென்னை சூப்பர் கிங்ஸ் வீரரான இவருக்கு தற்போது முதன்முதலாக சோதனை ஒன்று ஏற்பட்டுள்ளது. ஆம், ரெய்னாவுக்கு தற்போது காயம் ஏற்பட்டுள்ளதால் அடுத்த இரண்டு போட்டிகளுக்கு அவர் விளையாட மாட்டார் என தெரிகிறது.

ஏற்கனவே சிஎஸ்கே அணியின் நட்சத்திர வீரர் கேதார் ஜாதவ் காயம் காரணமாக தொடரில் இருந்து விலகிய நிலையில் தற்போது ரெய்னாவும் காயம் காரணமாக இரண்டு போட்டிகளில் விளையாட மாட்டார் என்ற தகவல் சிஎஸ்கே ரசிகர்களை வருத்தமடைய செய்துள்ளது.

வரும் ஞாயிறு அன்று மொகாலியில் பஞ்சாப் அணியுடன் விளையாடும் போட்டியிலும் வரும் 20ஆம் தேதி ராஜஸ்தான் அணியுடன் விளையாடும் போட்டியிலும் சுரேஷ் ரெய்னா கலந்து கொள்ள மாட்டார். சென்னையில் கொல்கத்தா அணிக்கு எதிரான போட்டியின்போது சுரேஷ் ரெய்னா காயமடைந்தார் என்பதும் தற்போது அவருக்கு மருத்துவ சிகிச்சை அவசியம் என்பதால் இரண்டு போட்டிகளில் அவர் விளையாடவில்லை என்பதும் குறிப்பிடத்தக்கது.

ரெய்னா, கேதார் ஜாதவ் ஆகியோர்களின் இழப்பால் மிடில் ஆர்டரில் பலவீனம் ஏற்படும் என்றாலும் பிராவோ, தோனி, தீபக் சாஹர், டூபிளஸ்சிஸ் ஆகியோர் மிடில் ஆர்டரில் ஃபார்மில் உள்ளனர் என்பது குறிப்பிடத்தக்கது.