வெயிலை பார்த்து ஏமாற வேண்டாம், இன்றும் மழை உண்டு. தமிழ்நாடு வெதர்மேன்
- IndiaGlitz, [Thursday,November 02 2017]
சென்னை உள்பட தமிழகம் முழுவதும் கடந்த சில நாட்களாக வடகிழக்கு பருவமழை பெய்து வரும் நிலையில் இன்று காலை முதல் வெயில் அடித்ததால் பொதுமக்கள் நிம்மதி அடைந்தனர் இந்த நிலையில் தமிழ்நாடு வெதர்மேன் தனது சமூக வலைத்தளத்தில் 'வெயிலை பார்த்து யாரும் பருவமழை முடிந்துவிட்டதாக கருத வேண்டாம், இன்று மாலையும் கடந்த செவ்வாய் இரவு போலவே மழை பெய்யும் என்று கூறியுள்ளார்.
இலங்கை கடலோர பகுதியில் நிலை கொண்டிருந்த காற்றழுத்தத் தாழ்வு நிலை இன்னும் அதே பகுதியில் நிலை கொண்டிருப்பதால் இன்னும் நான்கு அல்லது ஐந்து நாட்களுக்கு மழை தொடரும் என்றும், இன்று காலையில் வெயில் அடித்தாலும் மாலை முதல் மழை இன்னும் வேகமெடுக்கும் என்றும் கூறியுள்ளார்.
மேலும் செம்பரப்பாக்கம் ஏரி நிரம்பிவிட்டதாகவும், எந்த நேரத்திலும் உடையும் ஆபத்து இருப்பதாகவும் சமூகவலைத்தளங்களில் பரவி வரும் செய்தி, வெறும் வதந்தி என்றும், செம்பரப்பாக்கம் ஏரி உண்மையில் 20% மட்டுமே நிரம்பியுள்ளதால் இதுகுறித்து யாரும் கவலைப்பட தேவையில்லை என்றும் கூறிய தமிழ்நாடு வெதர்மேன், இத்தகைய வதந்திகளை பரப்புபவர்களுக்கு என்ன கிடைக்கும் என்று புரியவில்லை என்றும் கூறியுள்ளார்.