மணிரத்னம் உதவியாளராக பணிபுரியும் பிரபல நடிகரின் மகள்.. எதிர்கால கனவு என்ன தெரியுமா?
- IndiaGlitz, [Saturday,July 06 2024]
பிரபல நடிகரின் மகள் மணிரத்னம் அவர்களிடம் உதவி இயக்குனராக பணி செய்து கொண்டிருப்பதாகவும் தற்போது உருவாகி வரும் ’தக்லைஃப்’ படத்தில் கூட அவர் உதவி இயக்குனராக இருப்பதாகவும் கூறப்படுகிறது.
கடந்த 1986 ஆம் ஆண்டு ’நிலவே மலரே’ என்ற திரைப்படத்தின் மூலம் தமிழ் திரை உலகில் அறிமுகமானவர் நடிகர் ரகுமான். அதன் பின் ’வசந்த ராகம்’ ’புரியாத புதிர்’ ’புது புது அர்த்தங்கள்’ உள்ளிட்ட பல படங்களில் நாயகனாக நடித்த அவர் அஜித்தின் ’பில்லா’ சூர்யாவின் ’சிங்கம்’ உட்பட சில படங்களில் வில்லனாகவும் நடித்தார்.
சமீபத்தில் வெளியான ’பொன்னியின் செல்வன்’ இரண்டு பாகங்களிலும் மதுராந்தகன் கேரக்டரில் நடித்திருந்த ரகுமான், தற்போது ’அஞ்சாமை’ என்ற படத்தில் நடித்து வருகிறார். தமிழ் மட்டுமின்றி மலையாளம், தெலுங்கு ,ஹிந்தி படத்திலும் அவர் நடித்துள்ளார்.
இந்த நிலையில் ரகுமான் மகள்களில் ஒருவரான அலிஷா சிறுவயதிலிருந்து சினிமாவில் ஆர்வம் கொண்டவராக இருந்த நிலையில் தற்போது மணிரத்னம் அவர்களிடம் உதவி இயக்குனராக இருப்பதாகவும் அவர் ’தக்லைஃப்’ படத்திலும் பணிபுரிந்து வருவதாகவும் தெரிகிறது. இந்த நிலையில் ’தக்லைஃப்’ படத்தின் படப்பிடிப்பு முடிந்த பிறகு எதிர்காலத்தில் நடிகையாக அல்லது இயக்குனராக தனது பயணத்தை தொடங்குவார் என்று எதிர்பார்க்கப்படுகிறது.