ద్రౌపది వస్త్రాపహరణంతో ఏపీ రాజకీయాలను పోల్చి వైసీపీ రెబల్ ఎంపీ రఘురామ కృష్ణరాజు తీవ్ర భావోద్వేగానికి లోనయ్యారు. మంగళవారం ఆయన ఢిల్లీలోని తన నివాసంలో రచ్చబండ కార్యక్రమంలో మాట్లాడారు. అలనాడు కౌరవసభలో ద్రౌపది వస్త్రాపహరణం జరిగిందని.. నేడు అదే మాదిరిగా ఏపీలో న్యాయదేవతకు వస్త్రాపహరణం జరుగుతోందంటూ తీవ్ర భావోద్వేగానికి గురయ్యారు. నేటి అభినవ కౌరవసభలో తాను భాగస్వామినయినందుకు సిగ్గు పడుతున్నానని రఘురామ కృష్ణరాజు పేర్కొన్నారు. నాడు ద్రౌపదిని గోవిందుడు కాపాడితే.. నేడు న్యాయ వ్యవస్థను రాష్ట్రపతి కోవింద్ కాపాడుతారని ఆశాభావం వ్యక్తం చేశారు.

ఆంధ్రప్రదేశ్‌లో న్యాయవ్యవస్థను నిర్వీర్యం చేసేందుకు యత్నం జరుగుతోందని.. దానిని ‘ధరిత్రి ఎరుగని చరిత్ర’గా రఘురామ కృష్ణరాజు అభివర్ణించారు. రాజ్యాంగం న్యాయమూర్తులకు ఉద్దేశాలను ఆపాదించవద్దని స్పష్టం చేసినప్పటికీ దాడులు మాత్రం ఆగడం లేదన్నారు. పరిమితులనేవి పార్లమెంటుకు సైతం ఉన్నాయన్నారు. కోర్టులను దూషించిన వారిలో ఆమంచి కృష్ణమోహన్, నందిగం సురేశ్‌తో పాటు మరికొందరు రెడ్లు ఉన్నారని రఘురామ కృష్ణరాజు పేర్కనొ్నారు.

మరోవైపు సోషల్ మీడియాలో దూషణల పర్వం కొనసాగుతోందంటూ ఆరు నెలలుగా ఫిర్యాదులు చేస్తున్నప్పటికీ ప్రభుత్వం పట్టించుకున్న పాపాన పోవడం లేదన్నారు. వైసీపీ నేతలపై ఆరోపణలకు మాత్రమే ప్రాధాన్యమిస్తూ కేసులు నమోదు చేసి అరెస్టులు చేస్తున్నారని రఘురామ కృష్ణరాజు ఆరోపించారు. అంతేకాకుండా సీబీసీఐడీపై కూడా ఆయన విరుచుకుపడ్డారు. ఇంతవరకు ఒక్కరిని కూడా అరెస్టు చేయలేని, చేతకాని, నిస్సహాయ, నిస్సిగ్గు సీబీసీఐడీ రాష్ట్రంలో ఉందంటూ ఆగ్రహం వ్యక్తం చేశారు. రాష్ట్రంలో మాతృభాషలోనే హత్య చేసే ప్రయత్నం జరుగుతోందని రఘురామ కృష్ణరాజు ఆవేదన వ్యక్తం చేశారు.