உலகம் முழுவதும் இன்று அன்னையர் தினம் கடைபிடிக்கப்பட்டு வரும் நிலையில் டுவிட்டரில் இரண்டுக்கும் மேற்பட்ட அன்னையர் தின ஹேஷ்டேக்குகள் டிரண்டில் உள்ளன. திரையுலகினர், அரசியல்வாதிகள், சமூக ஆர்வலர்கள் என அனைவரும் அன்னையர் தின வாழ்த்துக்களை தெரிவித்து வருகின்றனர்.

இந்த நிலையில் வாழும் அன்னைக்கு கோவில் கட்டி அன்னை பாசத்தை வெளிப்படுத்திய நடிகரும் இயக்குனருமான ராகவா லாரன்ஸ் தனது சமூக வலைத்தள பக்கத்தில் அன்னையர் தின வாழ்த்துக்களை தெரிவித்துள்ளார். அவர் கூறியிருப்பதாவது:

உலகில் உள்ள அனைத்து அன்னையர்களுக்கும் எனது அன்னையர் தின வாழ்த்துக்கள். வாழும் அன்னைக்கு நான் கடந்த நான்கு வருடங்களாக ஆலயம் கட்டி வருகிறேன். உலகில் உள்ள அனைத்து அன்னைகளுக்கும் இந்த கோவிலை அர்ப்பணிக்கின்றேன். நான் பல ஆண்டுகளாக கடவுளை வெளியே தேடினேன். ஆனால் கடவுள் நமது அன்னைக்குள்ளும், பசியுடன் வாழும் ஏழைகளுக்குள்ளும் இருப்பதை கண்டறிந்தேன். எவர் ஒருவர் அன்னையை மகிழ்ச்சியாக வைத்து கொள்கின்றார்களோ, எவர் ஒருவர் ஒரு ஏழையின் பசியை போக்குகின்றார்களோ அவர் தன் வாழ்நாளில் தோல்வியே அடைவதில்லை’ என்று கூறியுள்ளார். ராகவா லாரன்ஸின் இந்த அன்னையர் தின வாழ்த்து தற்போது வைரலாகி வருகிறது.