తమిళ నటుడు శరత్ కుమార్, అతని భార్య, నిర్మాత రాధికా శరత్ కుమార్‌లకు చెక్ బౌన్స్ కేసులో ఏడాది పాటు జైలు శిక్ష పడింది. చెన్నైలోని సైదాపేట కోర్టు వారిద్దరికీ శిక్షను విధిస్తూ తీర్పును వెలువరించింది. 2017నాటి చెక్ బౌన్స్ కేసులో ఇరువురికీ న్యాయస్థానం ఏడాది శిక్ష విధించింది. అసలు విషయంలోకి వెళితే... గతంలో రాధిక, శరత్ కుమార్ దంపతులు.. మరో నిర్మాత లిస్టిన్ స్టీఫెన్‌తో కలిసి సంయుక్తంగా సినిమాలను నిర్మించేవాళ్లు.

ఈ క్రమంలోనే రేడియన్స్‌ మీడియా ప్రైవేటు లిమిటెడ్‌ సంస్థ నుంచి ఓ సినిమా కోసం వీరివురూ పెద్ద మొత్తంలో డబ్బును అప్పుగా తీసుకున్నారు. అయితే తీసుకున్న అప్పును సమయానికి తీర్చలేక పోగా... అప్పు చెల్లించేందుకు 2017లో రేడియన్స్‌ సంస్థకు చెక్‌ అందజేయగా.. అది కాస్త బౌన్స్‌ అయ్యింది. దీంతో రేడియన్స్‌ సంస్థ కోర్టును ఆశ్రయించింది. ఈ కేసులో 2019లో అరెస్ట్ వారెంట్ కూడా జారీ అయ్యింది. తాజాగా ఆ కేసును విచారించిన కోర్టు రాధిక దంపతులకు ఏడాది పాటు జైలు శిక్షను విధిస్తూ తీర్పును వెలువరించింది.