‘సాహో’ తరువాత యంగ్ రెబల్‌స్టార్‌ ప్రభాస్‌ వరుస సినిమాలను లైన్‌లో పెట్టేశాడు. ఈ క్రమంలోనే ప్రభాస్ హీరోగా 'జిల్‌' ఫేమ్‌ రాధాకృష్ణ కుమార్‌ దర్శకత్వంలో లేటెస్ట్‌ మూవీ 'రాధేశ్యామ్' తెరకెక్కుతున్న విషయం తెలిసిందే. ఈ చిత్రంలో ప్రభాస్ సరసన పూజా హెగ్డే హీరోయిన్‌గా నటిస్తోంది. వీరిద్దరికీ సంబంధించిన ఫస్ట్‌లుక్‌లు ఇప్పటికే విడుదలై అభిమానులను విపరీతంగా ఆకట్టుకున్నాయి. ఈ లవ్ అండ్ ఎంటర్‌టైనర్‌పై అంచనాలు భారీగానే ఉన్నాయి. ఈ చిత్రం శరవేగంగా షూటింగ్ జరుపుకుంటోంది. ప్రస్తుతం ఈ సినిమా హైదరాబాద్‌లో చిత్రీకరణ జరుపుకుంటోంది.

ఈ సినిమా విడుదల కోసం అభిమానులు ఎంతగానో ఎదురుచూస్తున్నారు. దీంతో సినిమా విడుదల తేదీపై నిర్మాతలు చర్చలు నిర్వహిస్తున్నట్టు తెలుస్తోంది. పిరియాడికల్ మూవీగా ఈ సినిమా తెరకెక్కుతోంది. లేటెస్ట్‌గా కొత్త సంవత్సరం సందర్భంగా చిత్ర యూనిట్‌ ఈ సినిమా నుంచి ప్రభాస్‌ మరో లుక్‌ను విడుదల చేసింది. ఓ మడుగు పక్కన స్టైలిష్‌ లుక్‌లో ప్రభాస్‌ కూర్చుని ఉన్నాడు. కృష్ణంరాజు సమర్పణలో యువీ క్రియేషన్స్‌ బ్యానర్‌పై ప్రమోద్‌, వంశీ, ప్రశీద ఈ చిత్రాన్ని నిర్మిస్తున్నారు. ప్రస్తుతం ఇండస్ట్రీ వర్గాల్లో వినిపిస్తోన్న సమాచారం మేరకు ఈ ప్యాన్‌ ఇండియా చిత్రాన్ని మార్చి 30న విడుదల చేయడానికి సన్నాహాలు చేసుకుంటున్నారు.