கேப்டன் விஜயகாந்த் மகன் சண்முகப்பாண்டியன் நடித்த 'மதுரவீரன்' திரைப்படம் வரும் பொங்கல் தினத்தில் வெளியாகவுள்ள நிலையில் இந்த படத்தின் பாடல்கள் சமீபத்தில் வெளியாகி நல்ல வரவேற்பை பெற்று வருகிறது

இந்த நிலையில் பிரபல பேட்மிண்டன் வீராங்கனையும் இந்தியாவிற்கு ஒலிம்பிக் போட்டியில் வெள்ளி பதக்கம் வாங்கி கொடுத்து பெருமைப்படுத்தியவருமான பி.வி.சிந்து, 'மதுர வீரன்' படத்தின் வீடியோ பாடலை நேற்று வெளியிட்டார். 'உன் நெஞ்சுக்குள்ள' என்று தொடங்கும் இந்த பாடல் தற்போது வைரலாகி வருகிறது. மேலும் பி.வி.சிந்து, விஜயகாந்தின் மூத்த மகனுக்கு சொந்தமான 'சென்னை ஸ்மாஷர்ஸ்' அணியில் விளையாடுபவர் என்பது குறிப்பிடத்தக்கது.

சண்முகப்பாண்டியன், மீனாட்சி, சமுத்திரக்கனி, வேலராமமூர்த்தி, பாலசரவணன், ஜி.மாரிமுத்து, மொட்டை ராஜேந்திரன் உள்பட பலர் நடித்துள்ள இந்த படத்திற்கு சந்தோஷ் தயாநிதி இசையமைத்துள்ளார். இயக்குனர் பி.ஜி.முத்தையா ஒளிப்பதிவில், ப்ரவீண் படத்தொகுப்பில் உருவாகியுள்ள இந்த படத்தை வி ஸ்டுடியோஸ் மற்றும் பிஜி மீடியா ஒர்க்ஸ் நிறுவனங்கள் தயாரித்துள்ளன. ஜல்லிக்கட்டு சம்பந்தப்பட்ட கதையம்சம் கொண்ட இந்த படம் ஜல்லிக்கட்டு நடைபெறும் பொங்கல் திருநாளில் வெளியாவதால் நல்ல வரவேற்பை பெறும் என்று எதிர்பார்க்கப்படுகிறது.