అల్లు అర్జున్ ఫ్యాన్స్‌కు పూనకాలే.. 'పుష్ప' గాడి మాస్ జాతర మొదలు..
- IndiaGlitz, [Tuesday,April 02 2024]
'పుష్ప' సినిమాతో ఐకాన్ స్టార్ అల్లు అర్జున్ దేశవ్యాప్తంగా క్రేజ్ సంపాదించుకున్న సంగతి తెలిసిందే. అంతేకాకుండా ఈ సినిమాలోని నటనగాను జాతీయ ఉత్తమ నటుడి అవార్డు కూడా అందుకున్నాడు. దీంతో ఆ చిత్రానికి సీక్వెల్‍గా వస్తున్న 'పుష్ప2'పై భారీ అంచనాలు ఏర్పడ్డాయి. ఇప్పటికే ఈ మూవీ నుంచి వచ్చిన గ్లింప్స్, పోస్టర్‌లు అభిమానులను విపరీతంగా ఆకట్టుకున్నాయి. తాజాగా మూవీ టీజర్ విడుదల తేదీని మూవీ యూనిట్ అధికారికంగా ప్రకటించింది. ఈ విషయాన్ని తెలియజేస్తూ పుష్ప మాస్ జాతర మొదలైందంటూ ఓ పోస్టర్ రిలీజ్ చేసింది.
పుష్ప మాస్ జాతరను మొదలుపెడదాం. ఎంతగానో ఎదురుచూస్తున్న పుష్ప2- ది రూల్ టీజర్ ఏప్రిల్ 8వ తేదీన రానుంది. ఫైర్‌ను డబుల్ చేసేందుకు అతడు వచ్చేస్తున్నాడు అని మైత్రీ మూవీ మేకర్స్ ట్వీట్ చేసింది. ఆగస్టు 15వ తేదీన ఈ చిత్రం ప్రపంచవ్యాప్తంగా రిలీజ్ కానుందని స్పష్టం చేసింది. ఈ పోస్టర్‌లో అల్లు అర్జున్ గజ్జెలు ధరించిన కాలు ఉంది. జాతర సీక్వెన్సులో వెనుక దీపాలు వెలుగుతుండగా.. నేలమీద పడిన కుంకుమపై కాలు మోపినట్టు ఈ పోస్టర్‌లో ఉంది. దీంతో టీజర్లో ఎక్కువగా జాతర యాక్షన్ సీక్వెన్స్ ఉండే అవకాశం ఉంది.
జాతరలో అల్లు అర్జున్ అమ్మోరు అవతారంలో నాట్యం చేయనున్నారట. అలాగే ఆ బ్యాక్ డ్రాప్‌లో ఓ అదిరిపోయే ఫైట్ సీక్వెన్స్ కూడా ఉండబోతుందని.. కేవలం ఈ ఒక్క సీక్వెన్స్ కోసమే దర్శకుడు సుకుమార్ చాలా ఖర్చు చేసి తెరకెక్కించారట. మూవీకి ఈ సీక్వెన్స్ హైలైట్ కాబోతుందని ఫిల్మ్‌నగర్ టాక్. ఈ చిత్రానికి రాక్‌స్టార్ దేవిశ్రీ ప్రసాద్ అదిరిపోయే బాణీలు అందించాడట. ఈ జాతర సాంగ్ కూడా ఫ్యాన్స్‌కు పూనకాలు తెప్పిస్తుందని చెబుతున్నారు. దీంతో అభిమానులు ఈ మూవీ కోసం ఆతృతగా ఎదురుచూస్తున్నారు.
ఇదిలా ఉంటే 'పుష్ప2' సినిమా షూటింగ్ ప్రస్తుతం శరవేగంగా సాగుతోంది. ఇటీవలే వైజాగ్‍లో షెడ్యూల్ పూర్తవ్వగా.. ప్రస్తుతం హైదరాబాద్‍లో షూటింగ్ జరుగుతోంది. భారీస్థాయిలో యాక్షన్ థ్రిల్లర్ ఎంటర్‌టైనర్‌గా ఈ చిత్రాన్ని తెరకెక్కిస్తున్నారు. ఈ సినిమాలో బన్నీ సరసన రష్మిక మందన్నా హీరోయిన్‍గా నటిస్తుండగా.. మలయాళ స్టార్ నటుడు ఫాహద్ ఫాజిల్ విలన్‍గా చేస్తున్నారు. వీరితో పాటు జగదీశ్ ప్రతాప్ బండారీ, జగపతి బాబు, ప్రకాశ్ రాజ్, సునీల్, అనసూయ భరద్వాజ్, రావు రామేశ్ కీలకపాత్రలు పోషిస్తున్నారు.