'మహర్షి' ఈవెంట్‌లో పేరు మిస్.. పూరీ రియాక్షన్
- IndiaGlitz, [Thursday,May 02 2019]
సూపర్స్టార్ మహేశ్, పూజా హెగ్దే జంటగా సూపర్హిట్ చిత్రాల దర్శకుడు వంశీ పైడిపల్లి తెరకెక్కించిన చిత్రం ‘మహర్షి’. ఈ చిత్రం వైజయంతి మూవీస్, శ్రీవెంకటేశ్వర క్రియేషన్స్, పి.వి.పి సినిమా పతాకాలపై హై- టెక్నికల్ వేల్యూస్‌తో రూపొందుతోన్న భారీ చిత్రం. ఇందులో అల్లరి నరేష్ కీలక పాత్రలో నటిస్తున్నారు. ఈ చిత్రాన్ని మే 9న వరల్డ్‌వైడ్‌గా విడుదల చేయనుండగా.. ‘మహర్షి’ ప్రీ రిలీజ్ ఫంక్షన్‌ను బుధ‌వారం(మే 1) రోజు హైద‌రాబాద్ పీపుల్స్ ప్లాజాలో ఘనంగా నిర్వహించారు.
మహేశ్, పూరీ మధ్య..!?
ఈవెంట్‌లో సూపర్స్టార్ మహేశ్ బాబు మాట్లాడుతూ ఆసక్తికర విషయాలు అభిమానులతో పంచుకున్నారు. తనకు హిట్ చిత్రాలిచ్చిన శ్రీనువైట్ల, త్రివిక్రమ్, కొరటాల శివ గురించి మాట్లాడిన మహేశ్.. తనను ‘స్టార్‌’ను చేసి.. ప్రిన్స్‌ను కాస్త ‘సూపర్స్టార్’గా చేసిన పూరీ జగన్నాథ్‌ను మరిచిపోయిన సంగతి తెలిసిందే. అయితే ట్విట్టర్ వేదికగా నా స్పీచ్‌లో ఒక ముఖ్యమైన వ్యక్తిని మిస్ చేశాను. నా 25 సినిమాల జర్నీలో ‘పోకిరీ’ చిత్రం నన్ను సూపర్‌స్టార్‌ను చేసింది. థ్యాంక్యూ యూ సో మచ్.. పూరీ జగన్నాథ్!!. ఈ సినిమాకు నాకు ఇచ్చినందుకు థ్యాంక్స్. ఈ చిత్రం నాకు ఎల్లప్పుడు గుర్తుండిపోతుంది.. అని ట్వీట్ చేశారు.
పూరీ రియాక్షన్..
మహేశ్ ట్వీట్కు డైరెక్టర్ పూరీ జగన్నాథ్ ట్విట్టర్‌లో రియాక్ట్ అయ్యారు. ‘థ్యాంక్యూ సో మచ్ సార్.. నేను ఎల్లప్పుడూ మిమ్మల్ని ప్రేమిస్తూనే ఉంటా.. ‘మహర్షి’ ట్రైలర్ రాకింగ్’ అంటూ నవ్వుతూ ఉన్న ఎమోజీని పూరీ ట్వీట్ చేశారు. కాగా మహేశ్ ట్వీట్ చేసిన కాసేపటికే పూరీ పై విధంగా రియాక్ట్ అయ్యారు. అయితే ఈ ట్వీట్కు మహేశ్ అభిమానులు, నెటిజన్లు పెద్ద ఎత్తున రియాక్ట్ అవుతున్నారు. సార్.. మహేశ్‌తో నెక్స్ట్ సినిమా ఎప్పుడు తీస్తున్నారు..? ‘జనగణమన’ సంగతి ఎంత వరకు వచ్చింది సార్..? అసలు మహేశ్‌తో ఎప్పుడు సినిమా తీస్తారో ఫస్ట్ మాకు చెప్పండి సార్.. అంటూ కామెంట్స్ చేస్తున్నారు. సో.. పూరీ-మహేశ్ సినిమా ఎప్పుడు సెట్స్ పైకి వెళ్తుందో వేచి చూడాల్సిందే మరి.