టాలీవుడ్ సూపర్ స్టార్ మహేశ్ బాబుతో ‘జనగణమన’ చిత్రాన్ని తెరకెక్కించాలని డాషింగ్ డైరెక్టర్ పూరీ జగన్నాథ్ ఎప్పట్నుంచో అనుకుంటున్న సంగతి తెలిసిందే. అయితే పూరీ వరుస ప్లాప్‌లతో సతమతం అవ్వడంతో.. ఆయనతో పనిచేయడానికి మహేశ్ అంతగా ఇంట్రెస్ట్ చూపలేదు. పరిస్థితులు చక్కబడ్డాక మళ్లీ మహేశ్‌తోనే సినిమా తీయాలని మైండ్‌లో పూరీ ఫిక్స్ అయిపోయాడు. అయినప్పటికీ మహేశ్ నుంచి ఎలాంటి స్పందన కాదు కదా.. లెక్కచేయకపోవడంతో ఇక వద్దనుకున్న పూరీ.. తెలుగుతో పాటు కన్నడ, తమిళ అగ్రహీరోల కోసం వేట సాగించారు.

అయితే ఎక్కడా ఈయనకు సరిపోయే హీరో దొరక్కపోవడంతో.. ఫైనల్‌‌గా టాలీవుడ్‌ స్టార్‌ హీరో యంగ్ రెబల్ ప్రభాస్‌తో ఈ సినిమా తీయాలని పూరీ దాదాపు ఫిక్స్ అయిపోయినట్లు విశ్వసనీయవర్గాల సమాచారం. అన్నీ అనుకున్నట్లు జరిగితే విజయదేవరకొండ సినిమా షూటింగ్ పూర్తవ్వగానే.. ‘జనగణమన’ను పట్టాలెక్కించాలని పూరీ భావిస్తున్నట్లు సమాచారం.

డార్లింగ్‌ రెడీ!

ఇదిలాఉంటే.. ఇప్పటికే మహేశ్‌కు పూరీ కథ వినిపించడమే కాదు.. ఓ డైలాగ్ కూడా వదలాడు. అయితే ఈ కథ గురించి కాస్త తెలుసుకున్న ప్రభాస్.. ‘సూపర్ పూరీ డార్లింగ్ బాగుంది’ అని తన సన్నిహితుల వద్ద అన్నాడట. ఈ విషయం ఈ చెవిన ఆ చెవిన పడి పూరీకి తెలియడంతో.. ప్రభాస్‌ను లైన్లో పెట్టాడట. ప్రస్తుతం ‘సాహో’ మూడ్‌లో ఉన్న ప్రభాస్‌కు కొద్దిరోజులు ఆగి తీరిగ్గా కూర్చొని కథ వినిపించాలని డాషింగ్ డైరెక్టర్ భావిస్తున్నట్లు తెలుస్తోంది.

మహేశ్ మిస్.. ప్రభాస్ ఫిక్స్!

కాగా.. ఇప్పటికే పూరీ-ప్రభాస్ కాంబోలో ‘బుజ్జిగాడు’, ‘ఏక్ నిరంజన్’ సినిమాలు వచ్చి మంచి హిట్ టాక్ తెచ్చుకున్నాయి. అయితే ‘జనగణమన’ వర్కవుట్ అయితే ముచ్చటగా మూడో సినిమా అన్న మాట. మొత్తానికి చూస్తే మహేశ్ ఈ సినిమా చేజేతులారా మిస్ చేసుకోవడంతో.. ప్రభాస్‌ను మాత్రం ‘జనగణమన’ వెతుక్కుంటూ వెళ్తోందన్న మాట. మరి ఈ వార్త పుకారుగానే మిగిలిపోతుందా..? పట్టాలెక్కి థియేటర్ల వరకు వస్తుందో తెలియాలంటే పూరీ నుంచి అధికారిక ప్రకటన వెలువడే వరకు వేచి చూడాల్సిందే మరి.