இரண்டு ஆண்டுகளுக்கு ஒருமுறை நடைபெறும் தமிழ் திரைப்பட தயாரிப்பாளர் சங்க தேர்தல் இன்று சென்னையில் உள்ள அண்ணா நகர் கந்தசாமி நாயுடு கல்லூரி வளாகத்தில் நடைபெற்று வருகிறது. இந்த தேர்தலுக்கான வாக்குப்பதிவு சற்று முன் தொடங்கியுள்ளது.

இந்த தேர்தலின் மூலம் தலைவர், துணைத்தலைவர், செயலாளர், பொருளாளர் உள்பட 27 பதவிகளுக்கு புதிய நிர்வாகிகள் தேர்வு செய்யப்படவுள்ளனர். விஷால், ஆர்.ராதாகிருஷ்ணன், கேயார் ஆகியோர் தலைமையில் 3 அணிகள் இந்த தேர்தலில் போட்டியிடுகின்றன. கலைப்புலி ஜி.சேகரன் மற்றும் டி.சிவா அணியினர் போட்டியில் இருந்து விலகி ஆர்.ராதாகிருஷ்ணன் அணியுடன் இணைந்துள்ளனர் என்பது குறிப்பிடத்தக்கது.

இன்று பதிவாகும் வாக்குகள் இன்று மாலையே எண்ணப்பட்டு இரவுக்குள் வெற்றி பெற்றவர்கள் யார் என்பது குறித்த முடிவுகள் அறிவிக்கப்படும் என்று எதிர்பார்க்கப்படுகிறது.