కాంగ్రెస్ జాతీయాధ్యక్షుడు రాహుల్ గాంధీ సోదరి ప్రియాంక గాంధీకి సంబంధించిన ఓ వీడియో నెట్టింట్లో వైరల్ అవుతోంది. ఉత్తరప్రదేశ్‌ ఎన్నికల ప్రచారంలో భాగంగా ప్రియాంక ఈ వీడియో చూశారు. ఈ వీడియోలో.. ప్రధాని నరేంద్ర మోదీకి వ్యతిరేకంగా చిన్న పిల్లలను ఒకింత రెచ్చగొట్టి వారితో ప్రధానిని దొంగ అనిపించారు.

'చౌకీదార్.. చోర్ హై' అంటూ ప్రధాని మోదీని ఉద్దేశించి కొందరు పిల్లలు చేసిన నినాదాలు సోషల్ మీడియాలో ప్రస్తుతం వైరల్‌గా మారాయి. పిల్లలు 'చౌకీదార్ చోర్ హై' నినాదాలు చేసినంతసేపు.. నవ్వుతూ చూసిన ప్రియాంక.. ఒక్కసారిగా వారు అభ్యంతరకర నినాదాలు చేయడంతో షాక్ తిన్నారు. అలాంటి నినాదాలు చేయవద్దంటూ వారిని వారించారు. దీంతో వెంటనే ఆ నినాదాలు ఆపేసి 'రాహుల్ గాంధీ జిందాబాద్' అంటూ నినాదాలు చేయడం మొదలుపెట్టారు.

ఈ వీడియో వైరల్‌గా మారడంతో బీజేపీ మద్దతుదారులు కాంగ్రెస్‌పై మండిపడుతున్నారు. చిన్నపిల్లలకు కాంగ్రెస్ నేర్పించే భాష ఇదేనా? అని ప్రశ్నిస్తున్నారు. ‘ప్రియాంక ఎలా రెచ్చగుడుతున్నారో.. ఇదండీ కాంగ్రెస్‌ సంస్కతి’ అంటూ 12 సెకండ్ల నిడివిగల వీడియో క్లిప్పింగ్‌తో బీజేపీ వర్గాలు ప్రచారం చేస్తున్నాయి.