ஒரு வயது மகளுடன் ஸ்பெஷல் தரிசனம்… வைரலாகும் நடிகை பிரியங்கா சோப்ரா புகைப்படம்!
- IndiaGlitz, [Friday,April 07 2023]
பாலிவுட்டை தொடர்ந்து ஹாலிவுட் சினிமாவில் வரவேற்பு பெற்ற நடிகையாக இருந்துவரும் பிரியாங்கா சோப்ரா கடந்த வாரம் தனது கணவர் நிக் ஜோனாஸ் மற்றும் குழந்தையோடு இந்தியாவிற்கு வருகை தந்தார். இதைத் தொடர்ந்து முதல் முறையாக தனது மகளை இந்தியா அழைத்துவந்த அவர் ஒரு சிறப்பான இடத்திற்குச் சென்றுள்ளார். அதுகுறித்த புகைப்படம் தற்போது வைரலாகி வருகிறது.
தமிழ் சினிமாவில் நடிகர் விஜய் நடிப்பில் வெளியான “தமிழன்” திரைப்படத்தில் அறிமுகமான நடிகை பிரியங்கா சோப்ரா தொடர்ந்து பாலிவுட் சினிமாவில் பல வெற்றிப் படங்களில் நடித்து முன்னணி நடிகையானார். தொடர்ந்து ஹாலிவுட்டில் ‘குவாண்டிகோ’ வெப் சீரிஸில் நடித்து வெற்றிப்பெற்ற அவர் பல ஹாலிவுட் திரைப்படங்களில் தற்போது நடித்துவருகிறார். அந்த வகையில் இவர் நடித்துள்ள “சிட்டாடல்” வெப் சீரிஸ் வெளிவர இருக்கும் நிலையில் “ஹெட்ஸ் ஆஃப் ஸ்டேட்“ எனும் திரைப்படத்திலும் இணைந்துள்ளார்.
இப்படி ஹாலிவுட் சினிமாவில் தொடர்ந்து முன்னேறி வரும் நடிகை பிரியங்கா சோப்ரா தனது கணவர் நிக் மற்றும் ஒரு வயது குழந்தை மால்டி மேரியுடன் கடந்த வாரம் மும்பை வந்திருந்தார். அவர் நீதா அம்பானியின் கலாச்சார மையத் திறப்பு விழாவில் கணவர் நிக்குடன் கலந்துகொண்டார். பிறகு தனது “சிட்டாடல்” வெப் சீரிஸ்க்கான பிரமோஷன் நிகழ்ச்சியில் இணை நடிகர் ரிச்சர்ட் டேனுடன் கலந்துகொண்டார்.
இந்நிலையில் தனது மகள் மால்டி மேரியுடன் சித்தி விநாயகர் கோவிலுக்குச் சென்று சுவாமி தரிசனம் செய்துள்ளார். அப்போது பாரம்பரிய முறையில் சேலை அணிந்திருந்த நடிகை பிரியங்கா, வெள்ளை கவுன் அணிந்திருந்த தனது மகள் மால்டியுடன் பிரார்த்தனை செய்துள்ளார். இதுகுறித்து “எம்எம் - இன் முதல் இந்தியா பயணம் சித்தி விநாயகரின் ஆசியுடன் இருக்க வேண்டும்” என்று நடிகை பிரியங்கா தனது இன்ஸ்டாகிராம் பக்கத்தில் பதிவிட்டுள்ளார். இந்தப் புகைப்படத்தைப் பார்த்த பிரபலங்கள் பலரும் மால்டி மேரிக்கு வாழ்த்துகளை பகிர்ந்து வருகின்றர்.