தமிழில் வளர்ந்து வரும் நடிகையான பிரியா பவானிசங்கர் தற்போது ‘இந்தியன் 2’ உள்பட ஒருசில தமிழ் திரைப்படங்களில் நடித்து வருகின்றார். இந்த நிலையில் ஐந்து மொழிகளில் தயாராக உள்ள ஒரு திரைப்படத்தில் நடிக்க பிரியா பவானிசங்கர் ஒப்பந்தமாகியுள்ளார்.

பிரபல தெலுங்கு நடிகர் மோகன்பாபுவின் மகன் மஞ்சு மனோஜ் ஹீரோவாக நடிக்கவிருக்கும் திரைப்படம் ஒன்று தமிழ், தெலுங்கு, கன்னடம், மலையாளம் மற்றும் ஹிந்தி ஆகிய மொழிகளில் தயாராக உள்ளது. இந்த படத்தின் கதை ஐந்து மொழிகளுக்கும் பொதுவான என்பதால் இந்த படம் இத்தனை மொழிகளில் தயாராகிறது என்பது குறிப்பிடத்தக்கது.

இந்த நிலையில் இந்த படத்தின் பூஜையுடன் கூடிய படப்பிடிப்பு ஹைதராபாத்தில் நடைபெற்றது. பிரபல தெலுங்கு நடிகர் ராம் சரண்தேஜா இந்த பட துவக்க விழாவில் கலந்துகொண்டு படக்குழுவினர்களை வாழ்த்தினார். பேபி நிவாரணா இயக்கவுள்ள இந்த படத்தின் திரைக்கதையை மோகன் பாபு மற்றும் கோபாலகிருஷ்ணன் ஆகியோர் எழுதியுள்ளனர்.

இந்த படத்தின் படப்பிடிப்பு வரும் மார்ச் 11ஆம் தேதி முதல் நடைபெற உள்ளது. இந்த படத்தின் மூலம் தெலுங்கு உள்பட நான்கு மொழிகளிலும் பிரியா பவானி சங்கர் அறிமுகமாகிறார் என்பதும் இந்த படம் வெற்றி பெற்றால் அவர் தென்னிந்திய அளவில் புகழ் பெற வாய்ப்பிருக்கிறது என்பது குறிப்பிடத்தக்கது.