Prime Minister Modi:బిహార్ సీఎం నితీశ్ కుమార్ 'సెక్స్' వ్యాఖ్యలపై ప్రధాని మోదీ ఆగ్రహం
- IndiaGlitz, [Wednesday,November 08 2023]
జనాభా నియంత్రణ విషయంలో మహిళలపై బిహార్ సీఎం నితీశ్‌కుమార్‌ చేసిన వ్యాఖ్యలు దేశ రాజకీయాల్లో దుమారం రేపుతున్నాయి. ఆయన వ్యాఖ్యలను మహిళా సంఘాలు తీవ్రంగా ఖండిస్తున్నాయి. తాజాగా ప్రధాని మోదీ సైతం నితీశ్ వ్యాఖ్యలపై మండిపడ్డారు. మధ్యప్రదేశ్‌లోని గుణలో ఎన్నికల ర్యాలీలో పాల్గొన్న మోదీ.. ప్రతిపక్షాల అహంకార కూటమిలో పెద్దనేత అయిన నితీశ్.. మంగళవారం అసెంబ్లీలో మహిళలను ఉద్దేశించి అసభ్య పదజాలం ఉపయోగించారని ఫైర్ అయ్యారు. ఇలాంటి వ్యాఖ్యలు చేయడం సిగ్గుగా అనిపించడం లేదా..? ఆ కూటమిలోని ఏ ఒక్కనేత కూడా నితీశ్ మాటలను ఖండించలేదని ఆగ్రహం వ్యక్తం చేశారు. మహిళల గురించి ఇలాంటి నీచమైన ఆలోచనలు ఉన్నవారు మీకు ఏదైనా మంచి చేయగలరా..? అని ప్రశ్నించారు. నితీశ్ ఇంకా ఎంతగా దిగజారిపోతారు..? అంటూ మోదీ ధ్వజమెత్తారు.
ఇటీవల బిహార్‌లో నిర్వహించిన కులగణనకు సంబంధించిన నివేదికను మంగళవారం అసెంబ్లీలో ప్రవేశపెట్టిన సందర్భంగా నితీశ్ వివాదాస్పద వ్యాఖ్యలు చేశారు. ఆ బిహార్‌లో సంతానోత్పత్తి రేటు 4.2 నుంచి 2.9కి పడిపోయింది.. త్వరలోనే ఇది 2%కి తగ్గుతుందని అంచనా వేస్తున్నామన్నారు. మహిళలు విద్యావంతులైతే జనాభా నియంత్రణలో ఉంటుందని చెబుతూ షాకింగ్‌ కామెంట్లు చేశారు. భార్య చదువుకుంటే గర్భం రాకుండా శృంగారం చేయడం ఎలా అనేది ఆమెకు తెలుసు. సంభోగం చివరలో ‘బయటకు తీసేయాలి’ అనే విషయం చదువుకున్న మహిళలకు తెలుస్తుందని వ్యాఖ్యానించారు. ఈ వ్యాఖ్యలపై మహిళా సంఘాలు, విపక్షాలు తీవ్ర ఆగ్రహం వ్యక్తం చేశాయి.
ఈ వ్యాఖ్యలపై దేశవ్యాప్తంగా దుమారం రేగడంతో క్షమాపణలు చెబుతున్నట్లు నితీశ్ తెలిపారు. తన మాటలను వెనక్కి తీసుకుంటున్నానని.. తాను చేసిన వ్యాఖ్యలను తప్పుగా అర్థం చేసుకున్నారన్నారు. దేశంలో స్త్రీ విద్య గురించి మాత్రమే తాను మాట్లాడానని.. తన వ్యాఖ్యలు ఎవరినైనా బాధపెట్టి ఉంటే క్షమించండని విజ్ఞప్తి చేశారు. మరోవైపు బిహార్ డిప్యూటీ సీఎం తేజస్వీ యాదవ్ మాత్రం నితీశ్‌కి మద్దతుగా నిలిచారు. ఆయన కేవలం సెక్స్ ఎడ్యుకేషన్‌ గురించి మాత్రమే.. జనాభా నియంత్రణకు ప్రాక్టికల్‌గా ఏం చేయాలనేది వివరించారని.. ఇందులో తప్పేముందని వెల్లడించారు.