மூன்று தேசிய விருதுகள் பெற்ற படத்தின் ரீமேக்கில் பிரசாந்த்!
- IndiaGlitz, [Friday,August 16 2019]
ஒருகாலத்தில் அஜித், விஜய்க்கு இணையான ஸ்டாராக இருந்த நடிகர் பிரசாந்த், கடந்த சில ஆண்டுகளாக திரையுலகில் இருந்து ஒதுங்கியுள்ளார். இந்த நிலையில் பாலிவுட்டில் சூப்பர் ஹிட் வெற்றி பெற்றது மட்டுமின்றி மூன்று தேசிய விருதுகள் பெற்ற படம் ஒன்றின் ரீமேக்கில் பிரசாந்த் நடிக்கவுள்ளதாக தகவல்கள் வெளிவந்துள்ளது
ஸ்ரீராம் ராகவன் இயக்கத்தில் ஆயுஷ்மான் குரானா, தபு, ராதிகா ஆப்தே உள்ளிட்ட பலர் நடிப்பில் வெளியான படம் 'அந்தாதுன்'. கடந்த ஆண்டு வெளியான இந்தப் படம் இந்தியாவில் மட்டுமின்றி சீனா உள்பட உலகின் பல நாடுகளில் வெளியாகி வசூல் சாதனை புரிந்தது. இந்த படத்தில் நடித்த ஆயுஷ்மான் குரானாவுக்கு தேசிய விருது கிடைத்தது மட்டுமின்றி சிறந்த படம் மற்றும் சிறந்த திரைக்கதை ஆகிய தேசிய விருதுகளையும் வென்றது
இந்த நிலையில் இந்த படத்தின் தமிழ் ரீமேக்கில் நடிக்க ஒருசில முன்னணி நட்சத்திரங்கள் ஆர்வம் காட்டி வந்த நிலையில் தற்போது இந்த படத்தின் ரீமேக் உரிமையை நடிகரும் தயாரிப்பாளருமான தியாகராஜன் பெற்றுள்ளார். இதனையடுத்து அவரது மகன் பிரசாந்த் இந்த படத்தில் ஆயுஷ்மான் கேரக்டரில் நடிக்கவிருப்பதாகவும், இந்த படத்தின் இயக்குநர், இதர நடிகர்கள் மற்றும் தொழில்நுட்பக் கலைஞர்கள் தேர்வு நடைபெற்று வருவதாகவும் தியாகராஜன் தெரிவித்துள்ளார்.