జనసేన అధినేత పవన్ కల్యాణ్‌పై ప్రముఖ నటుడు ప్రకాష్ రాజ్ మండిపడ్డారు. ఆయనను ఊసరవెల్లితో పోలిస్తూ సంచలన వ్యాఖ్యలు చేశారు. పవన్ కల్యాణ్ బీజేపీకి సపోర్ట్ చేయడాన్ని ఆయన తప్పుబట్టారు. మీకంటూ ఒక సొంత పార్టీ పెట్టుకుని మరో పార్టీ నాయకుడిని సపోర్ట్ చేయడమేంటంటూ ఆగ్రహం వ్యక్తం చేశారు. అసలు గత ఎన్నికల్లో ఆంధ్రాలో మీ పార్టీ ఓటు షేర్ ఏంటి? బీజేపీ ఓటు షేర్ ఎంటని నిలదీశారు. ఒక్కో ఎన్నికల సమయంలో ఒక్కో విధంగా మాట్లాడుతూ.. పవన్ కల్యాణ్ ఊసరవెల్లిలా మారిపోయారని పవన్ విమర్శించారు.

ఓ ప్రముఖ మీడియా ఛానల్‌తో ప్రకాష్ రాజ్ మాట్లాడుతూ.. ‘‘పవన్ కల్యాణ్‌కు ఏమైందో నాకు అర్థం కావడం లేదు. నేను పవన్ కల్యాణ్ తీరుతో నేను చాలా డిజప్పాయింట్ అయ్యాను. నీకు నువ్వే ఒక లీడర్‌వి. జనసేన అనే పార్టీ ఉంది మీకు. మీరు ఇంకో నాయకుడి వైపు వేలు చూపిస్తుండటమేంటి? ఆంధ్రాలో గత ఎన్నికల్లో మీ ఓటు షేర్ ఏంటి? బీజేపీ ఓటు షేర్ ఏంటి? మీరెందుకు ఆయన భుజాన ఎక్కారు? మీరే 2014లో అద్భుతం వాళ్లు.. ఇంద్రుడు, చంద్రుడు అంటూ వాళ్లను సపోర్ట్ చేశారు. గత ఎన్నికల్లో లేదు వాళ్లు ద్రోహం చేశారని రివర్స్ వచ్చారు. మళ్లీ ఇప్పుడు మీకు నాయకుడిగా కనిపిస్తున్నారు. అంటే ఇలా పదే పదే మారుతున్నారంటే ఊసరవెల్లి అయి ఉండాలి కదా. దేశ ప్రయోజనాల కోసమే బీజేపీకి సపోర్ట్ చేస్తున్నారంటే నమ్మొద్దు. అది చేస్తున్నారా వీళ్లు ఈ ఎలక్షన్స్‌లో వచ్చి? వీళ్లు మాట్లాడుతున్న మాటలేంటి?’’ అంటూ ప్రకాష్‌రాజ్ మండిపడ్డారు.