மலையாள சூப்பர்ஸ்டார்கள் மம்முட்டி, மோகன்லால் ஆகியோர் பல நேரடி தமிழ்ப்படங்களில் நடித்திருக்கும் நிலையில் இன்னொரு மலையாள திரையுலகின் பிரபலம் ஒருவர் தமிழ்ப்படம் ஒன்றில் அறிமுகமாகிறார்.

சூப்பர் ஹிட் ஆன மலையாள திரைப்படமான 'ஷட்டர்' உள்பட ஏராளமான திரைப்படங்களை இயக்கிய இயக்குனர் ஜாய் மாத்யூஸ். இவர் இயக்குனர் மட்டுமின்றி மலையாளத்தில் பல படங்களில் நடித்துள்ளார். இந்நிலையில் பிரபுதேவா நடிப்பில் இயக்குனர் ஏ.எல்.விஜய் இயக்கவுள்ள படத்தில் பிரபுதேவாவின் தந்தையாக நடிக்க ஜாய் மாத்யூஸ் ஒப்பந்தமாகியுள்ளார். இந்த படத்தில் தமன்னா ஹீரோயின் என்பது குறிப்பிடத்தக்கது.

பிரபுதேவாவுடன் ஜாய் மாத்யூஸ் எடுத்த புகைப்படம் ஒன்று அவருடைய சமூகவலைத்தளத்தில் வெளியாகியுள்ளதே இந்த செய்தியை மேலும் உறுதிப்படுத்தியுள்ளது. இந்த படத்தை பிரபுதேவா ஸ்டுடியோஸ் நிறுவனம் தயாரிக்கின்றது என்பது குறிப்பிடத்தக்கது.