வினோத்கண்ணா மறைவால் பாகுபலி 2' பட ரிலீஸில் மாற்றம்?
- IndiaGlitz, [Thursday,April 27 2017]
பழம்பெரும் பாலிவுட் நடிகரும் பாஜக எம்பியுமான வினோத்கண்ணா இன்று காலமானார். அவருடைய மறைவு பாலிவுட் திரையுலகினர்களை பெரும் சோகத்தில் ஆழ்த்தியுள்ளது.
இந்நிலையில் நாளை உலகம் முழுவதும் வெளியாகவுள்ள 'பாகுபலி 2' படத்தின் பிரத்யேக காட்சி ஒன்று இன்று மாலை பிரபலங்களுக்காக மும்பையில் உள்ள ஒரு திரையரங்கில் திரையிட திட்டமிடப்பட்டிருந்தது. இதற்கான ஏற்பாடுகளை 'பாகுபலி 2' இந்தி உரிமையை கைப்பற்றியுள்ள கரண்ஜோகர் செய்திருந்த நிலையில் இன்றைய காட்சியை அவர் ரத்து செய்தார்.
இதுகுறித்து கரண்ஜோகர் கூறியபோது, "அன்புக்குரிய வினோத் கண்ணா அவர்களின் மறைவு எங்களை சோகத்தில் ஆழ்த்தியுள்ளது. இந்த மறைவு எங்கள் அனைவருக்கும் ஒரு அதிர்ச்சியே. அவரது மறைவுக்கு மரியாதை செலுத்தும் விதமாக, பாகுபலி 2-ம் பாகத்தின் பிரத்யேக காட்சி ரத்து செய்யப்படுகிறது" என்று தெரிவித்துள்ளார்.
இன்றைய 'பாகுபலி 2' திரைப்படத்தின் சிறப்பு காட்சி ரத்து செய்யப்பட்டதால் அனைத்து நகரங்களை போலவே நாளைதான் மும்பையிலும் ரிலீஸ் ஆகவுள்ளது என்பது குறிப்பிடத்தக்கது.