ஒரே படத்தில் பிரபாஸ், மோகன்லால், சரத்குமார்.. முக்கிய கேரக்டரில் காஜல் அகர்வால்..!
- IndiaGlitz, [Monday,May 20 2024]
ஒரே திரைப்படத்தில் தென்னிந்திய பிரபலங்களான பிரபாஸ், மோகன்லால் , சரத்குமார், மோகன் பாபு ஆகியோர் நடிக்க உள்ள நிலையில் இந்த படத்தில் ஒரு முக்கிய கேரக்டரில் காஜல் அகர்வால் நடிக்க இருப்பதாக தகவல் வெளியாகி உள்ளன. மேலும் பிரபல பாலிவுட் நடிகர் அக்சய்குமாரும் இந்த படத்தில் இணைகிறார்.
தெலுங்கு திரையுலகில் முன்னணி நடிகரான விஷ்ணு மஞ்சு தயாரிக்க இருக்கும் திரைப்படம் ’கண்ணப்பா’. இந்த படத்தின் பூஜை இன்று நடைபெற உள்ளது என்றும் 63 நாயன்மார்களில் ஒருவரான கண்ணப்ப நாயனாரின் வாழ்க்கை வரலாற்றை மையப்படுத்தி இந்த படம் உருவாக இருப்பதாகவும் கூறப்படுகிறது.
மிகப்பெரிய பட்ஜெட்டில் பான் - இந்திய திரைப்படமாக உருவாகும் இந்த படத்தில் தென்னிந்திய பிரபலங்களான பிரபாஸ், மோகன்லால், சரத்குமார் மற்றும் மோகன் பாபு மற்றும் பாலிவுட் நடிகர் அக்சய்குமார் நடிக்கின்றனர். முகேஷ் குமார் சிங் இயக்கத்தில் உருவாக இருக்கும் இந்த படத்தில் காஜல் அகர்வால் இணைந்து உள்ளதாகவும், இன்னும் சில பிரபல நடிகைகளும் இணைய வாய்ப்பு உள்ளதாகவும் தகவல் வெளியாகி உள்ளன.
நடிகை காஜல் அகர்வால் கடந்த ஆண்டு ‘கோஸ்ட்டி’, ‘கருங்கல்பாளையம்’ ஆகிய இரண்டு தமிழ் படங்களிலும் ஒரு தெலுங்கு படத்திலும் நடித்திருந்தார். இந்த ஆண்டு அவர் நடிப்பில் உருவான ’இந்தியன் 2’ என்ற தமிழ்ப்படமும் இரண்டு தெலுங்கு படங்களும் வெளியாகவுள்ளன. இந்த நிலையில் தற்போது விஷ்ணு மஞ்சு தயாரிக்கும் ’கண்ணப்பா’ திரைப்படத்தில் அவர் நடிக்க ஒப்பந்தமாகி உள்ளார் என்பது குறிப்பிடத்தக்கது.