యంగ్ రెబల్ స్టార్ ప్రభాస్, బాలీవుడ్ బ్యూటీ శ్రద్ధా కపూర్ జంటగా నటిస్తున్న చిత్రం ‘సాహో’. యంగ్ అండ్ టాలెంటెడ్ డైరెక్టర్ సుజిత్ దర్శకత్వం వహిస్తున్నారు. యు.వి క్రియేషన్స్ పతాకంపై వంశీ, ప్రమోద్ ఈ సినిమాని నిర్మిస్తున్నారు. దాదాపు రూ.300 కోట్ల బడ్జెట్‌తో తెరకెక్కుతున్న ఈ సినిమాని తెలుగుతో పాటు.. హిందీలో కూడా నిర్మిస్తున్నారు. ఇందులో నీల్ నితిన్ ముఖేష్, జాకీ ష్రాఫ్, మందిరా బేడి, టీను ఆనంద్, మురళి శర్మ, అరుణ్ విజయ్ ముఖ్య పాత్రలు పోషిస్తున్నారు.

ప్రస్తుతం గత వారం రోజులుగా దుబాయ్‌లోని అబుదాబిలో యాక్షన్ సన్నివేశాలను చిత్రీకరిస్తున్నారు. ఈ యాక్షన్ సన్నివేశాల్లో ప్రతినాయకుడి పాత్ర పోషిస్తున్న నీల్ నితిన్ ముఖేష్ కూడా పాల్గొంటున్నారు. ఇదిలా ఉంటే.. హీరో ప్రభాస్ గురించి ఓ ఆసక్తికరమైన విషయాన్ని తెలిపారు నీల్ నితిన్. అందరినీ “డార్లింగ్” అని సంబోధించే ప్రభాస్‌ను ఇప్పుడు దేశానికే “డార్లింగ్” అని నీల్ నితిన్ అభివర్ణిస్తున్నారు. ప్రభాస్‌తో ఎవరైనా కలిసి పనిచేస్తే.. వాళ్ళని వెంటనే తనతో ప్రేమలో పడిపోయేలా చేసేస్తాడని ఇన్‌స్టాగ్రామ్‌ ద్వారా తెలియజేసారు. అలాగే.. తను, తన కుటుంబ సభ్యులు ప్రభాస్‌తో కలిసి దిగిన ఫోటోలను ఇన్‌స్టాగ్రామ్‌లో పోస్ట్ కూడా చేసారు ఈ యంగ్ విలన్.