రాజ‌మౌళి రూపొందించిన మ‌గ‌ధీర‌తో మెగాప‌వ‌ర్ స్టార్ రామ్‌చ‌ర‌ణ్ ఇండ‌స్ట్రీ హిట్ కొడితే.. అదే రాజ‌మౌళి తెర‌కెక్కించిన బాహుబ‌లితో రెబ‌ల్ స్టార్ ప్రభాస్ కూడా ఇండ‌స్ట్రీ హిట్ ని సొంతం చేసుకున్నారు. ఇదిలా ఉంటే.. ప్ర‌స్తుతం రామ్‌చ‌ర‌ణ్ 1985 నాటి ప‌రిస్థితుల నేప‌థ్యంలో రంగ‌స్థ‌లం అనే సినిమా చేస్తున్న సంగ‌తి తెలిసిందే.

సుకుమార్ ద‌ర్శ‌క‌త్వంలో రూపొందుతున్న ఈ చిత్రంలో స‌మంత హీరోయిన్‌గా న‌టిస్తోంది. యాదృచ్ఛికంగా జ‌రుగుతున్నా.. ప్ర‌భాస్ కూడా 1960, 70 నాటి ప‌రిస్థితుల్లో ఓ సినిమా చేయ‌బోతున్నారు.

జిల్ ఫేమ్ రాధాకృష్ణ ద‌ర్శ‌క‌త్వంలో రూపొందుతున్న ఈ చిత్రం యూర‌ప్ నేప‌థ్యంలో సాగే ప్రేమ‌క‌థా చిత్రంగా తెర‌కెక్కుతోంది. బాలీవుడ్ సంగీత‌ద‌ర్శ‌కుడు అమిత్ త్రివేది మ్యూజిక్ అందించ‌నున్న ఈ చిత్రం త్వ‌ర‌లోనే సెట్స్ పైకి వెళ్ల‌నుంది. ప్ర‌స్తుతం ప్ర‌భాస్ సాహో అనే త్రిభాషా చిత్రంలో న‌టిస్తున్న సంగ‌తి తెలిసిందే.

శ్ర‌ద్ధా క‌పూర్ హీరోయిన్‌గా న‌టిస్తున్న ఈ చిత్రంలో భారీ తారాగ‌ణ‌మే ఉంది. ర‌న్ రాజా ర‌న్ ఫేమ్ సుజిత్ ద‌ర్శ‌క‌త్వంలో తెర‌కెక్కుతున్న ఈ చిత్రం వ‌చ్చే సంవ‌త్స‌రం ప్రేక్ష‌కుల ముందుకు రానుంది.