బాహుబ‌లి త‌ర్వాత ప్యాన్ ఇండియా స్టార్‌గా ప్ర‌భాస్ వ‌రుస సినిమాలు చేస్తున్న సంగతి తెలిసిందే. సాహో విడుద‌ల త‌ర్వాత రాధేశ్యామ్ సెట్స్‌పై ఉంది. నాగ్ అశ్విన్‌తో దీపికా ప‌దుకొనె హీరోయిన్‌గా చేయ‌బోయే సైన్స్ ఫిక్ష‌న్ మూవీ లైన్‌లో ఉంది. ఇప్పుడు తాజాగా ప్ర‌భాస్ త‌న 22వ చిత్రంగా ‘ఆదిపురుష్‌’ను ప్ర‌క‌టించారు. దీనికి సంబంధించిన ‘ఏ’ అనే అక్ష‌రాన్ని విడుద‌ల చేశారు. ప్ర‌భాస్ ఇన్ అండ్ యాస్ ఆదిపురుష్ అనే పోస్ట‌ర్‌, అందులో చెడుపై మంచి సాధించిన విజ‌యం అనే ట్యాగ్‌లైన్‌తో సినిమా టైటిల్‌ను అనౌన్స్ చేయ‌డం విశేషం.

తొలిసారి ప్ర‌భాస్ బాలీవుడ్‌లో ద‌ర్శ‌కుడు ఓంరావుత్‌తో చేస్తున్న ప్రాజెక్ట్ ఇది. విడుద‌ల చేసిన పోస్ట‌ర్ అందులోని విష‌యాల‌ను గ‌మ‌నిస్తే ఇదొక పౌరాణిక చిత్ర‌మ‌ని అర్థ‌మ‌వుతుంది. పోస్టర్‌లోని ‘ఏ’ అనే అక్ష‌రంలో విల్లు ప‌ట్టుకున్న వ్య‌క్తి, ఆంజ‌నేయ‌స్వామి, ప‌దిత‌ల‌లున్న వ్య‌క్తి, లంకా ద‌హ‌నం అంశాలు స్పష్టంగా తెలుస్తున్నాయి. అంటే ఇది పౌరాణిక చిత్ర‌మ‌ని అర్థ‌మ‌వుతూ ఉంది. రూ.350 కోట్ల బ‌డ్జెట్‌తో హిందీ, తెలుగు, త‌మిళ‌, క‌న్న‌డ‌, మల‌యాళ భాష‌ల్లో సినిమా రూపొంద‌నుంది. భారీ మ‌ల్టీస్టార‌ర్ మూవీగానే సినిమా తెర‌కెక్క‌నుంది. హీరోయిన్ ఎవ‌రు? ఇత‌ర నటీన‌టులు, సాంకేతిక నిపుణులు ఎవ‌రు అని తెలియాలంటే కొన్ని రోజులు ఆగాల్సిందే!!