పవర్‌స్టార్ పవన్ కల్యాణ్.. ఈపేరుకున్న క్రేజ్ గురించి ప్రత్యేకంగా చెప్పనక్కర్లేదు. కోట్లాది మంది అభిమానులకు ఆరాధ్య దైవంగా.. తెలుగు చలనచిత్ర సీమ రికార్డులను తిరగరాసిన స్టార్‌గా, మెగాస్టార్ చిరంజీవి ముద్దుల తమ్ముడిగా ఆయన అందరికీ సుపరిచితం. సూపర్‌స్టార్ అయినప్పటికీ.. ఒదిగి వుండే తత్వం ఆయనది. ఆపదల్లో వున్న వారిని ఆదుకునేవరకు పవన్ విశ్రమించారు. సమాజానికి ఏదో చేయాలనే తపనతో ఎంతో బిజీగా వుంటూ కొంత సమయం ప్రజల కోసం కేటాయించి రియల్ స్టార్ అనిపించుకున్నారు. ఇలాంటి లక్షణాలే ఆయనను మిగిలిన హీరోలతో ప్రత్యేకంగా నిలబెట్టింది.

మేనల్లుడితో కలిసి నటిస్తోన్న పవన్ :

ఇక పవన్‌లో బహుముఖ ప్రజ్ఞ దాగున్న సంగతి తెలిసిందే. నటుడిగా, దర్శకుడిగా, నిర్మాతగా, సింగర్‌గా, రాజకీయవేత్తగా రాణిస్తున్నారు. ఇక సినిమానే ప్రాణం భావించే పవన్ కల్యాణ్ ఇందుకోసం ఎంతో శ్రద్ధ తీసుకుంటారు. సినిమా కోసం ప్రత్యేక శిక్షణ, వేషధారణ, శరీర సౌష్టవం ఇలా అన్ని రకాలుగా సిద్ధమవుతారు. తాజాగా మేనల్లుడు సాయిథరమ్ తేజ్‌తో కలిసి తమిళ సూపర్‌‌హిట్ మూవీ‘‘వినోదయ సీతమ్’’ తెలుగు రీమేక్‌లో నటిస్తున్నారు. తమిళ్‌లో ఈ చిత్రానికి దర్శకత్వం వహించిన సముద్రఖని..తెలుగులోనూ డైరెక్షన్ బాధ్యతలు చేపట్టారు.

ఆ క్యారెక్టర్ కోసం మాంసాహారానికి దూరంగా:

అందులోనూ మేనల్లుడితో పవన్ కలిసి నటిస్తుండటంతో చిత్ర పరిశ్రమలో దీనిపై భారీ అంచనాలున్నాయి.తెలుగులో సముద్రఖని పోషించిన కాలపు దేవుడు క్యారెక్టర్‌లో పవన్.. తంబి రామయ్య నటించిన పాత్రలో సాయితేజ్ యాక్ట్ చేయనున్నారు. అయితే ఈ చిత్రం కోసం పవన్ సంచలన నిర్ణయం తీసుకున్నారు. కాలపు దేవుడు అనేది పవిత్రమైన పాత్ర కావడంతో సినిమా షూటింగ్ అయ్యే వరకు మాంసాహారం ముట్టుకోకూడదని పవన్ డిసైడ్ అయినట్లుగా ఫిలింనగర్‌లో గుసగుసలు వినిపిస్తున్నాయి. స్వతహాగా శరీరాన్ని ఆరోగ్యంగా వుంచుకునేందుకు పవన్ మంచి ఆహారం తీసుకుంటారు. ఇక నాన్ వెజ్ ప్రియుడు కావడంతో పవన్ ఈ నిర్ణయం తీసుకోవడంతో కొంచెం నోరు కట్టేసుకోవాల్సిందే. పీపుల్స్ మీడియా ఫ్యాక్టరీ తెరకెక్కిస్తోన్న ఈ చిత్రానికి థమన్ సంగీతం అందిస్తున్నారు. పవన్ ప్రాణ మిత్రుడు త్రివిక్రమ్ స్క్రీన్ ప్లే , మాటలు అందించనున్నట్లుగా తెలుస్తోంది.