கமல் கட்சியுடன் நேற்று செ.கு.தமிழரசனின் இந்திய குடியரசு கட்சி கூட்டணி வைத்த நிலையில் தென்சென்னை தொகுதியின் இந்திய குடியரசு கட்சியின் வேட்பாளராக தான் போட்டியிடவுள்ளதாக நடிகர் பவர்ஸ்டார் சீனிவாசன் தெரிவித்துள்ளார்.

இதுகுறித்து விளக்கம் அளித்த பவர்ஸ்டார் சீனிவாசன், 'செ.கு.தமிழரசனின் இந்திய குடியரசு கட்சி தான் கமல் கட்சியுடன் கூட்டணி வைத்துள்ளதாகவும், தான் போட்டியிடுவது அகில இந்திய குடியரசுக்கட்சி வேட்பாளராக என்றும், இந்த கட்சியின் தலைவர் ராம்தாஸ் அத்வாலே என்றும், இந்த கட்சியின் மாநில நிர்வாகியாக தான் இருப்பதாகவும் தெரிவித்தார்.

அதிமுக, திமுக ஆகிய இரண்டு பலமான கட்சிகளை மக்கள் துணையோடு தான் சந்திக்கவுள்ளதாகவும், இன்னும் ஓரிரு நாட்களில் செய்தியாளர்களை சந்தித்து வாக்காளர்களுக்கு தனது மெசேஜை தெரிவிக்கவுள்ளதாகவும் பவர்ஸ்டார் சீனிவாசன் கூறியுள்ளார்.

மேலும் தன்மீதுள்ள வழக்குகள் தான் தேர்தலில் போட்டியிட தடையாக இருக்காது என்றும் தென்சென்னை தொகுதியில் வெற்றி பெற்று மக்கள் தொண்டாற்றுவேன் என்றும் பவர்ஸ்டார் சீனிவாசன் மேலும் கூறினார்.