పవర్‌స్టార్ పవన్ కల్యాణ్ హీరోగా క్రిష్ దర్శకత్వంలో హరిహర వీరమల్లు అనే సినిమా తెరకెక్కుతోన్న సంగతి తెలిసిందే. ఈ చిత్ర షూటింగ్ శరవేగంగా జరుగుతోంది. ప్రస్తుతం పవన్ కల్యాణ్‌పై హాలీవుడ్ స్టంట్ కొరియోగ్రాఫర్ టోడోర్ లాజరోవ్ నేతృత్వంలో కొన్ని పోరాట సన్నివేశాలను చిత్రీకరిస్తున్నారు. కాగా, ఈ సినిమా సెట్స్‌కు సీనియర్ ఆర్ట్ డైరెక్టర్ పద్మశ్రీ తోట తరణి వచ్చారు. ఈ సందర్భంగా ఆయనకు పుష్పగుచ్ఛం అందించి, శాలువా కప్పి సత్కరించారు పవన్. హైదరాబాదులో హరిహర వీరమల్లు కోసం తోట తరణి అద్భుతమైన సెట్స్ ను రూపొందించారు. 17వ శతాబ్దం నాటి కథకు తగ్గట్టుగా సెట్స్ వేశారు. వీటిని పవన్ కల్యాణ్ మెచ్చుకున్నారు.

ఏ.ఎం. రత్నం మెగా సూర్యా మూవీస్ బ్యానర్ పై ఏ.దయాకర్ రావుతో కలిసి ఈ చిత్రాన్ని నిర్మిస్తున్నారు. భారీ బడ్జెట్ తో తెరకెక్కుతున్న ఈ మూవీ మొఘలుల కాలం నాటి నేపథ్యంలో సాగనుంది. తెలంగాణలోని హైదరాబాద్‌లో అల్యూమినియం ఫ్యాక్టరీలో ఈ చిత్రం కోసం భారీ జలపాతం సెట్ వేశారు. ఈ చిత్రంలో పవన్ కల్యాణ్ సరసన నిధి అగర్వాల్ హీరోయిన్ గా నటిస్తుండగా, బాలీవుడ్ నటుడు అర్జున్ రాంపాల్, సోనాక్షి సిన్హా, జాక్వెలిన్ ఫెర్నాండెజ్‌లు కీలక పాత్రలు పోషించనున్నారు. ఎం.ఎం.కీరవాణి ఈ మూవీకి సంగీతం అందిస్తున్నారు.

ఇకపోతే.. ఈ సినిమా కోసం తన శరీరాకృతిని పూర్తిగా మార్చేశారు పవర్ స్టార్. భీమ్లానాయక్ క్యారెక్టర్ నుంచి వీరమల్లుగా పవన్ పూర్తిగా మేకోవర్ అయ్యారు. భీమ్లాకు వీరమల్లుకు పూర్తిగా తేడాలు కనిపిస్తున్నాయి. బాడీని ఫిట్‌గా ఉంచేందుకు పవన్ కల్యాణ్ నిపుణుల పర్యవేక్షణలో ప్రత్యేకమైన ఎక్సర్ సైజ్ లు చేస్తున్నట్టుగా ఫిలింనగర్ టాక్. మరోవైపు హరిహర వీరమల్లులోని యుద్ధ విన్యాసాల కోసం ఫ్లైక్సిబుల్ బాడీ కోసం శ్రమిస్తున్నారు పవర్ స్టార్. ఈ పవర్ ఫుల్ రిహార్సల్స్ కు సంబంధించిన ఫొటోలను మేకర్స్ షేర్ చేశారు. వాటిల్లో పవన్ కళ్యాణ్ ఫుల్ ఎనర్జిటిక్ గా, ఫిట్ గా కనిపిస్తున్నారు. అలాగే బళ్లెం, కర్రసాములపైనా పవన్ కసరత్తు చేస్తున్నారు.