అనుకున్నదే నిజం అయ్యింది. భీమ్లా నాయక్ రిలీజ్ వాయిదా పడుతుందంటూ జరుగున్న ప్రచారం ఊహాగానాలు కాదు... వాస్తవమే అని తేలింది. పవర్‌స్టార్ పవన్ కల్యాన్- రానా కలిసి నటిస్తోన్న భీమ్లా నాయక్‌ విడుదలను వాయిదా వేస్తున్నట్లు మేకర్స్ మంగళవారం అఫీషియల్‌గా అనౌన్స్ చేశారు. సంక్రాంతి కానుకగా జనవరి 12న విడుదల కావాల్సిన ఈ సినిమాను ఫిబ్రవరి 25కి మారుస్తున్నట్లు చిత్ర యూనిట్ తెలిపింది.

ఆర్ఆర్ఆర్, రాధేశ్యామ్ వంటి పాన్ ఇండియా సినిమాలు సంక్రాంతికి రిలీజ్ కానున్నాయి. ఈ నేపథ్యంలో డిస్ట్రిబ్యూట‌ర్స్‌, ఎగ్జిబిట‌ర్స్‌ ఎలాంటి ఇబ్బందులు ఎదుర్కోకుండా ‘‘భీమ్లా నాయ‌క్’’ పోటీ నుంచి తప్పుకుంది. ఈ మేరకు స్టార్ ప్రొడ్యూసర్ దిల్‌రాజు .. భీమ్లా నాయక్ నిర్మాతలను ఒప్పించినట్లు ఫిలింనగర్ టాక్. అందరి శ్రేయస్సును దృష్టిలో పెట్టుకుని రిలీజ్‌ను పోస్ట్‌పోన్ చేశారు.

ఈ సినిమాలో పవర్‌స్టార్ ‘భీమ్లా నాయక్’ అనే పోలీస్ ఆఫీసర్ పాత్రలో నటిస్తున్నారు. మలయాళంలో హిట్టైన ‘అయ్యప్పనుమ్ కోషియుమ్’ మూవీ రీమేక్ .. దీనికి యంగ్ డైరెక్టర్ సాగర్ చంద్ర దర్శకత్వం వహిస్తున్నారు. త్రివిక్రమ్ కథ, స్క్రీన్ ప్లే అందిస్తున్నారు. పవన్‌కు జోడీగా నిత్యామీనన్‌, రానాకు జంటగా సంయుక్త మీనన్ నటిస్తున్నారు. సితార ఎంటర్‌టైన్‌మెంట్స్‌ బ్యానర్‌పై సూర్యదేవర నాగవంశీ ‘‘భీమ్లా నాయక్’’ను నిర్మిస్తున్నారు. ఇటీవలే వికారాబాద్‌లో కొత్త షెడ్యూల్ ప్రారంభమైంది.