రేవంత్ రెడ్డి వ్యవహారం : ఇది నా తప్పే సరిచేసుకుంటా!
- IndiaGlitz, [Tuesday,June 09 2020]
కాంగ్రెస్ ఎంపీ రేవంత్ రెడ్డిని ప్రముఖ సినీ రచయిత, నటుడు పోసాని కృష్ణమురళి తీవ్ర విమర్శలు గుప్పించారని సోషల్ మీడియాలో, యూ ట్యూబ్ చానెల్స్‌లో పెద్ద ఎత్తున వార్తలు వస్తున్న విషయం తెలిసిందే. ఇటీవల మీడియా మీట్ నిర్వహించిన ఆయన.. నందమూరి బాలకృష్ణ, వైఎస్ జగన్ పాలన గురించి మాట్లాడారు. అయితే.. రేవంత్ గురించి మాట్లాడారని.. తీవ్ర విమర్శలు వచ్చాయి. అంతేకాదు.. రేవంత్ ఫ్యాన్స్, అనుచురులు సోషల్ మీడియాలో పోసానిని టార్గెట్ చేస్తూ పోస్ట్‌లు పెడుతున్నారు. ఈ మొత్తం వ్యవహారంపై పోసాని స్పందిస్తూ ఓ ప్రకటన విడుదల చేశారు.
ఎప్పుడూ కామెంట్ చేయలేదు..
‘గత ఆదివారం జరిగిన నా ప్రెస్‌‌మీట్‌లో గౌరవనీయులు ఎంపీ రేవంత్ రెడ్డి గారిని వ్వక్తిగతంగా, రాజకీయంగా విమర్శించానని, అలాగే ఘాటు వ్యాఖ్యలు చేసానని వార్తలు వచ్చాయి. అలాగే రేవంత్ రెడ్డిపై పోసాని ఫైర్‌.. రేవంత రెడ్డి పై పోసాని ఘాటు కామెంట్స్‌ అని సోషల్ మీడియాలోనూ.. యూ ట్యూబ్ చానల్స్‌లోనూ విపరీతంగా ట్రోల్‌ అవుతున్న విషయం నా దృష్టికి వచ్చింది. అది చూసి నేను ఎంతో భాదపడ్డాను. అలాగే ఈ విషయం మీద ఎంపీ రేవంత్ రెడ్డి గారు.. ఆయన సన్నిహితులు, ఆయన అభిమానులు మనస్తాపం చెందారని తెలిసింది. నాకు తెలసిగానీ.. తెలియక గానీ నా లైఫ్‌‌లో రేవంత్ రెడ్డిగారి ని వ్వక్తిగతంగా గానీ.. రాజకీయ పరంగా కానీ ఎప్పుడూ కామెంట్ చేయలేదు. మొన్న జరిగిన ప్రెస్‌ మీట్‌లో కూడా నేను తప్పుగా మాట్లడలేదు. ఎప్పుడైనా ప్రెస్‌మీట్‌ లో ప్రతిపక్షం వారు విమర్శ చేసేటప్పుడు.. విమర్శతో పాటు సాక్ష్యం కూడా ఉంటే బాగుంటుంది. అలా ఉంటే అది జనం కూడా నమ్ముతారు. జనం గుండెల్లోకి కూడా మీ వార్త చేరుతుంది. అలా అయితే ప్రజలకు మేలు జరుగుతుంది అనే ఉద్దేశంతో మాట్లాడానే తప్ప నేను ఎవరిగురించి తప్పుగా మాట్లాడలేదు. మరీ ముఖ్యంగా రేవంత్ రెడ్డి గురించి నేను అసలు మాడ్లడలేదు. ఆయన అంటే నాకు ఎంతో గౌరవం. అయినా సోషల్ మీడియాలో యూట్యూబ్‌ ఛానల్స్‌లో బాగా ట్రోల్‌ అవుతున్నాయి కాబట్టి ఇది నాబాధ్యతగా తీసుకొని రేవంత్ రెడ్డికి.. ఆయన అభిమానులకు విచారం వ్వక్తం చేస్తున్నాను. ఇది నా తప్పుగానే భావించి.. ఈ తప్పును రెక్టిఫై చేసుకుంటాను’ అని పోసాని ప్రకటనలో పేర్కొన్నారు.