'పూలరంగడు' కాంబినేష‌న్ మ‌రోసారి..
- IndiaGlitz, [Saturday,March 24 2018]
హాస్యనటుడు సునీల్.. తన కెరీర్ మొత్త‌మ్మీద హీరోగా నాలుగే నాలుగు హిట్ చిత్రాలను తన ఖాతాలో వేసుకోగలిగారు. వాటిలో ఒకటి ‘పూలరంగడు’ చిత్రం. 2012లో విడుదలైన ఈ చిత్రానికి వీరభద్రమ్‌ చౌదరి దర్శకత్వం వహించారు. అప్ప‌ట్లో మంచి లాభాలే మూట‌గ‌ట్టుకుని ఘన విజయాన్ని అందుకుందీ సినిమా. ఆరు సంవత్సరాల గ్యాప్ తర్వాత మళ్ళీ ఈ ద్వయం మ‌రో కామెడీ ఎంట‌ర్‌టైన‌ర్‌తో ప్రేక్ష‌కుల ముందుకు రానుంద‌ని స‌మాచారం.
కాస్త వివరాల్లోకి వెళితే.. సునీల్, వీరభద్రమ్‌ కాంబినేషన్‌లో తెరకెక్కబోతున్న కొత్త చిత్రాన్ని అంజిరెడ్డి నిర్మించనున్నారని తెలిసింది. అంజి రెడ్డి ప్రొడక్షన్స్ బ్యానర్‌పై నిర్మితమవుతున్న ఈ చిత్రం తాజాగా ప్రీ-ప్రొడక్షన్ పనులను ప్రారంభించుకుంద‌ని టాలీవుడ్ వ‌ర్గాలు పేర్కొంటున్నాయి. 2016లో సందీప్ కిషన్, నిత్య మీనన్ జంటగా ‘ఒక అమ్మాయి తప్ప’ అనే చిత్రాన్ని నిర్మించారు అంజిరెడ్డి. ఇదిలా ఉంటే.. ప్రస్తుతం సునీల్ పూర్తి స్థాయి కమెడియన్‌గా రవితేజ, శ్రీనువైట్ల కలయికలో తెరకెక్కుతున్న ‘అమర్ అక్బర్ ఆంటోనీ’ మూవీలో నటిస్తున్నారు.