అనతి కాలంలో స్టార్ హీరోయిన్ల జాబితాలో ఒక రకంగా చెప్పాలంటే ప్రస్తుతం టాలీవుడ్‌లో నంబర్ 1 స్థానంలో ఉన్న హీరోయిన్ పూజా హెగ్డే. అలాగే ప్రస్తుతం ఇండస్ట్రీలో అనుష్క తర్వాత అత్యంత రెమ్యునరేషన్ పొందుతున్న హీరోయిన్ కూడా పూజాయే కావడం విశేషం. వరుస సినిమాలు.. అందునా ఆమె చేసిన సినిమాలన్నీ బ్లాక్ బస్టర్ హిట్ కొట్టడంతో అమ్మడికి విపరీతంగా క్రేజ్ పెరిగింది. దీంతో రెమ్యునరేషన్ కూడా భారీగానే పెరిగింది.

ప్రస్తుతం ఈ ముద్దుగుమ్మ మలయాళం స్టార్ హీరో దుల్కర్ సల్మాన్ సరసన ఛాన్స్ కొట్టేసింది. హను రాఘవపూడి దర్శకత్వంలో తెరకెక్కనున్న సినిమాలో దుల్కర్ హీరోగా నటిస్తున్నాడు. ఈ సినిమాను ‘మహానటి’ ప్రొడ్యూసర్స్ తెరకెక్కిస్తున్నారు. యుద్ధం నేపథ్యంలో ఈ సినిమా తెరకెక్కనుంది. ఈ పిరియాడిక్ లవ్ స్టోరీలో ఇద్దరు హీరోయిన్లు నటిస్తుండగా.. ఒక పాత్రకు పూజా ఇప్పటికే సైన్ చేసేసినట్టు తెలుస్తోంది. అయితే ఈ సినిమా కోసం పూజా డిమాండ్ చేసిన రెమ్యునరేషన్ గురించి పెద్ద ఎత్తున చర్చ జరుగుతోంది.

ఈ సినిమా కోసం పూజా హెగ్డే.. 2.50 కోట్ల రూపాయల రెమ్యునరేషన్‌ను డిమాండ్ చేసినట్టు సమాచారం. అయితే ప్రొడ్యూసర్లు స్వప్న దత్, ప్రియాంక దత్‌లు రెమ్యునరేషన్‌ను కాస్త తగ్గించుకునేలా పూజాను కన్విన్స్ చేసి ఈ సినిమాలో నటించేందుకు ఒప్పించారని టాక్. ఈ సినిమా రెగ్యులర్ షూటింగ్ వచ్చే ఏడాది జనవరిలో ప్రారంభం కానుందని తెలుస్తోంది. మరో కథానాయిక పాత్రలో స్టార్ హీరోయిన్ నటించనుందని తెలుస్తోంది. అయితే ఆమెకు సంబంధించిన వివరాలైతే తెలియరాలేదు.