హీరోయిన్ పూజా హెగ్డే కెరీర్ ప్రస్తుతం పీక్ స్టేజ్‌లో ఉంది. టాలీవుడ్‌లో స్టార్ హీరోయిన్‌గా వెలుగొందుతోంది. టాలీవుడ్‌లో నంబర్ 1 స్థానంలో కొనసాగుతున్న ఈ ముద్దుగుమ్మకు ఇప్పుడిప్పుడే బాలీవుడ్ నుంచి కూడా అవకాశాలు భారీగానే వస్తున్నాయి. దీంతో అమ్మడి స్టార్ మరింత పెరిగిపోయింది. ఈ క్రమంలోనే పారితోషికం కూడా స్టార్ హీరోలతో సమానంగా అందుకుంటోంది. తాజాగా పూజా ఓ ఇంటిని కూడా కొనుగోలు చేసిందని సమాచారం.

ముంబైలోని బాంద్రాలో పూజా ఒక అపార్ట్‌మెంటులో త్రిబుల్ బెడ్‌రూమ్ ఫ్లాట్‌ని కొనుగోలు చేసిందని టాక్. దీని ప్రత్యేకత స్కైలైన్ వ్యూ అని తెలుస్తోంది. దీని ఖరీదు దాదాపు రూ.20 కోట్లని సమాచారం. ఇంటీరియర్ డిజైనింగ్ మొత్తం పూజా దగ్గరుండి చేయించుకుందని తెలుస్తోంది. గతేడాది పూజా హెగ్డే నటించిన ‘అల వైకుంఠపురములో’ బ్లాక్ బస్టర్ హిట్ కొట్టడంతో అమ్మడి క్రేజ్ మరింత పెరిగింది. దీంతో యంగ్ రెబల్ స్టార్ ప్రభాస్ సరసన అవకాశం అందుకుంది.

పూజ ప్రస్తుతం తెలుగులో ‘రాధేశ్యామ్’, ‘మోస్ట్ ఎలిజబుల్ బ్యాచిలర్’, ‘ఆచార్య’ సినిమాలు చేస్తోంది. అలాగే హిందీలో సల్మాన్ ఖాన్, అక్షయ్ కుమార్, రణ్‌వీర్ సింగ్ వంటి హీరోలతో నటిస్తోంది. ఇటు టాలీవుడ్, అటు బాలీవుడ్.. మొత్తానికి వచ్చిన అవకాశాన్నల్లా వినియోగించుకుంటూ.. అమ్మడు దీపమున్నప్పుడే ఇల్లు చక్కబెట్టుకోవడం అనే నానుడిని చక్కగా ఫాలో అవుతోంది.