பொங்கல் உள்பட விழா காலங்களில் கூடுதல் காட்சிகள் திரையிட தமிழக அரசு அனுமதித்து வரும் நிலையில் இந்த ஆண்டு பொங்கல் தினத்திலும் திரையரங்குகளில் 5 காட்சிகள் திரையிட தமிழக அரசு அனுமதி வழங்கியுள்ளது.

இது குறித்து தமிழ்நாடு திரையரங்கு உரிமையாளர்கள் சங்கத்தின் சார்பில் வௌியிடப்பட்டுள்ள செய்திக் குறிப்பு ஒன்றில் கூறியிருப்பதாவது:  ''தமிழகத்தில் வரும் ஜனவரி 12, 17, 18 ஆகிய பொங்கல் விடுமுறை நாட்களில் கூடுதலாக ஒரு காட்சி அதாவது 5 காட்சிகளை தியேட்டர்களில் வெளியிட தமிழக அரசு அனுமதி வழங்கியுள்ளது. மேலும் ஜனவரி 13, 14, 15, 16 ஆகிய தேதிகளில் ஏற்கனவே உள்ள அரசாணையின்படி காலை 9 மணிக்கு ஒரு காட்சி வெளியிடலாம். இதற்கான தகவலை கேளிக்கை வரி அதிகாரிகளுக்கு மாவட்ட கலெக்டர் தெரிவித்துவிட்டு கூடுதல் காட்சிகளை தியேட்டர் அதிபர்கள் நடத்திக்கொள்ளலாம்'' என்று தெரிவிக்கப்பட்டுள்ளது.

பொங்கல் தினத்தில் தமிழில் 'தானா சேர்ந்த கூட்டம், ஸ்கெட்ச், குலேபகாவலி ஆகிய படங்கள் வெளியாகவுள்ள நிலையில் இந்த படங்கள் ஐந்து காட்சிகள் திரையிடப்படும் என்பது குறிப்பிடத்தக்கது.