அரசியல் அவ்வளவு ஈசி அல்ல: கமல், ரஜினிக்கு விஜயசாந்தி அறிவுரை
- IndiaGlitz, [Tuesday,November 27 2018]
தமிழகத்தில் நடைபெறவுள்ள அடுத்த சட்டமன்ற பொதுத்தேர்தல் முன்னாள் முதல்வர்கள் ஜெயலலிதா, கருணாநிதி இல்லாத முதல் தேர்தல் ஆகும். இந்த தேர்தலில் பல கட்சிகள் களமிறங்கினாலும் புதியதாக களமிறங்கவுள்ள ரஜினிகாந்த், கமல்ஹாசன் கட்சிகளின் நிலை என்னவாக இருக்கும் என்பதே அனைவரின் எதிர்பார்ப்பாக உள்ளது.
இந்த நிலையில் தெலுங்கானாவில் கடந்த 20 வருடங்களாக அரசியலில் ஈடுபட்டு வரும் நடிகை விஜயசாந்தி, தமிழகத்தில் கமல், ரஜினி அரசியல் குறித்து கருத்து கூறியபோது, 'சினிமாவில் 'இருந்து அரசியலுக்கு வருபவர்கள் கண்டிப்பாக அதிகமாக உழைக்க வேண்டும். அதுவும் கடின உழைப்பாக இருக்க வேண்டும். அரசியல் அவ்வளவு ஈசி அல்ல. நான் தெலுங்கானாவில் அரசியலுக்கு வந்து 20 ஆண்டுகள் ஆகிறது. தெலுங்கானாவுக்காக 20 ஆண்டுகள் போராடி வருகிறேன். இன்று எனது கனவு நிறைவேறியிருக்கிறது.
அதேபோல் தமிழகத்தில் ரஜினி, கமல் யார் என சினிமாத்துறையினர் யார் வந்தாலும் கண்டிப்பாக மக்கள் மத்தியில் இருக்க வேண்டும். நல்லது செய்ய வேண்டும். இவை எல்லாம் கடினமாக இருக்கும். ஆனால் அதை அவர்கள் செய்தால் நிச்சயம் அரசியலில் வெற்றி பெற முடியும்,. அவர்களுக்கு எனது வாழ்த்துக்கள்' என்று விஜயசாந்தி கூறியுள்ளார்.
நடிகை விஜயசாந்தி, கமல்ஹாசனுடன் 'இந்திரன் சந்திரன்' படத்திலும் ரஜினியுடன் 'மன்னன்' படத்திலும் இணைந்து நடித்துள்ளார் என்பது குறிப்பிடத்தக்கது.